Buk Song 71:12-20

¹²Orait God, yu no ken i stap longwe long mi. God bilong mi, yu mas i kam hariap na helpim mi.

¹³Dispela ol man i sutim tok long mi, yu ken daunim ol na pinisim ol tru. Ol i laik bagarapim mi, olsem na yu mas paulim ol na mekim ol i sem nogut tru.

¹⁴Tasol bai mi bilip long yu oltaim na mi wet long yu i helpim mi. Bai mi litimapim nem bilong yu moa yet.

¹⁵Bai mi tokim ol manmeri long stretpela pasin yu bin mekim. Mi no save gut long as bilong olgeta samting yu bin mekim, tasol maski, long olgeta de bai mi tokim ol long yu bin kisim bek mi.

¹⁶God, Bikpela, bai mi tingim bikpela strong bilong yu na bai mi litimapim nem bilong yu. Bai mi autim tok olsem, “Bikpela tasol em i stretpela.”

¹⁷God, yu bin skulim mi long taim mi liklik yet na i kam inap long nau, na mi save tokaut yet long ol gutpela gutpela samting yu bin mekim.

¹⁸Nau mi lapun pinis na gras bilong mi i waitpela olgeta, tasol God, yu no ken lusim mi. Yu mas i stap wantaim mi na bai mi autim tok bilong bikpela strong bilong yu long ol lain manmeri i kamap bihain.

¹⁹God, stretpela pasin bilong yu inapim olgeta hap, na i stap ples klia long ai bilong olgeta manmeri. Yu bin mekim bikpela wok tru. I no gat wanpela man bilong graun i wankain olsem yu. Nogat. Yu winim olgeta.

²⁰Yu bin salim olkain hevi i kam long mi. Tasol mi save, bai yu strongim mi gen. I olsem mi stap long matmat na yu kirapim mi gen.