Buk Song 56:6-11

⁶Ol i save bung wantaim na hait i stap. Ol i was gut long wokabaut bilong mi, na ol i laik kilim mi i dai.

⁷God, yu mas mekim save long ol long pasin nogut ol i mekim. Yu mas belhat long ol na winim ol na daunim ol.

⁸Yu save long mi karim hevi na mi pilim nogut tru long en, na mi krai i stap. Orait yu tingting yet long dispela, na yu raitim pinis long buk bilong yu.

⁹God, mi save pinis long yu. Yu laik helpim mi, olsem na bihain bai mi beten long yu, na bai yu ranim ol birua na ol i ranawe.

¹⁰Mi save bilip long God, na mi tingting long promis bilong en. Olsem na mi litimapim nem bilong en. Tru tumas, mi tingting long promis bilong Bikpela, na mi litimapim nem bilong en.

¹¹Mi save bilip long God, olsem na mi no ken pret long wanpela samting. Bai ol man inap mekim wanem samting long mi? Nogat.