Buk Song 51:1-4

¹Devit i bin mekim trabel long Batseba, na bihain profet Natan i kam sutim tok long em. Na Devit i tingting long sin bilong en na i raitim dispela song. Em i song bilong man i bosim musik. God, yu as bilong sori, yu ken marimari long mi. Yu gat bikpela marimari tru, olsem na mi laik bai yu rausim olgeta pasin nogut bilong mi.

²Yu mas wasim mi olgeta, na bai pasin nogut i no i stap moa long mi. Rausim sin bilong mi na mi ken kamap klin.

³Mi save mi mekim rong pinis. Mi no inap lusim tingting long sin bilong mi.

⁴Mi mekim sin long yu wanpela tasol. Mi mekim pasin nogut long ai bilong yu. Olsem na yu mekim stretpela pasin tasol na yu kotim mi na yu bekim sin bilong mi.