Buk Song 45:4-10

⁴Yu nambawan king i gat biknem. Yu sindaun long hos na yu go long pait na winim pait. Yu laik pait bai ol man i no inap daunim tok tru. Na yu pait bilong helpim ol man bai ol i ken wokabaut stret. Bai pait bilong yu i kamap strong moa, na i mekim ol man nogut i pret tru long yu.

⁵Ol spia bilong yu i sap tumas na i sutim tru ol birua. Yu daunim ol arapela lain long pait, na ol i stap aninit long yu.

⁶God, yu stap king oltaim oltaim. Yu save bosim ol manmeri bilong yu long stretpela pasin tasol.

⁷Yu save laikim stretpela pasin na yu no laikim tru pasin nogut. Olsem na king, God bilong yu yet em i bin kapsaitim wel long yu bilong makim yu olsem man i gat biknem. Na dispela i mekim yu i amamas moa yet. Ol poroman bilong yu ol i no inap amamas olsem yu.

⁸Longpela klos bilong yu i gat gutpela smel moa bilong ol kain kain sanda olsem mea na kasia. Ol i bin bilasim haus bilong king long ol kain kain bilas ol i wokim long tit bilong elefan, na ol i mekim musik bilong mekim yu i amamas.

⁹Ol pikinini meri bilong ol king i stap long haus bilong yu wantaim ol meri i gat biknem. Kwin i sanap long han sut bilong yu. Em i putim bilas gol ol i bin wokim long gol bilong kantri Ofir.

¹⁰Yu yangpela meri i laik marit long king, yu harim tok bilong mi na tingting long en. Yu mas lusim tingting long ol manmeri i stap long ples bilong yu, na yu mas lusim tingting long ol wanblut bilong yu.