Buk Song 44:19-26

¹⁹Tasol yu bagarapim mipela long ples bilong ol wel abus. Na yu karamapim mipela long tudak nogut tru.

²⁰God bilong mipela, sapos mipela i lusim tingting pinis long yu, na mipela i prea long ol giaman god, yu bai save.

²¹Yu save long olgeta tingting i hait i stap long bel bilong mipela man.

²²Mipela i stap manmeri bilong yu, olsem na long olgeta taim ol i save kilim mipela i dai. Ol i lukim mipela i olsem sipsip bilong kilim i dai tasol.

²³Bikpela, yu kirap. Bilong wanem yu slip? Yu kirap. Yu no ken givim baksait oltaim long mipela.

²⁴Bilong wanem yu hait long mipela? Ol man i mekim nogut long mipela na mipela i karim bikpela hevi moa. Yu no ken lusim tingting long hevi bilong mipela.

²⁵Mipela i pundaun long graun, na bodi bilong mipela i slip olsem ol man i dai pinis.

²⁶God, yu kirap na yu kam helpim mipela. Tingting long sori bilong yu, na kisim bek mipela bai mipela i no ken i dai.