Buk Song 36:1-4

¹Devit, wokman bilong Bikpela, em i raitim dispela song. Em i song bilong man bilong bosim musik. Sin i stap long bel bilong man nogut, na i givim sampela tok long em. Dispela kain man i no save pret liklik long God. Nogat tru. Em i givim baksait long God.

²Em i save hambak long em yet na i ting olsem, “Mi namba wan tru. God i no inap painimaut long ol pasin nogut mi bin mekim, na em i no inap kotim mi.”

³Oltaim dispela man i save tok long mekim pasin nogut na long giamanim ol arapela man. Em i no gat gutpela tingting moa bilong mekim gutpela pasin.

⁴Taim em i slip long bet, na em i save tingting long ol rot bilong mekim ol pasin nogut. Em i save bihainim rot nogut tasol, na em i no save givim baksait long pasin nogut.