Buk Song 35:1-11

¹Devit i raitim dispela song. Bikpela, yu mas krosim ol man i gat kros long mi. Yu mas pait long ol man i save pait long mi.

²Kisim klos pait wantaim hap plang bilong pait, na kam helpim mi.

³Kisim spia na akis na kam pait long ol man i ranim mi. Yu tokim mi olsem, yu man bilong helpim mi.

⁴Ol dispela man i laik kilim mi i dai. Yu mas winim ol long pait na mekim ol i sem. Ol i pasim tok bilong bagarapim mi. Yu mas ranim ol na paulim ol tru.

⁵Bikpela, ensel bilong yu i ken rausim ol dispela man nogut, olsem win i rausim pipia gras.

⁶Ensel bilong yu i ken ranim ol i go, na mekim rot bilong ol i kamap tudak na i wel nogut.

⁷Mi no bin mekim rong long ol, tasol ol i haitim umben bilong bagarapim mi. Na ol i wokim wanpela hul bilong mi ken pundaun long en.

⁸Tasol taim ol i no save yet, yu mekim bagarap i kisim ol. Na dispela umben ol i putim bilong bagarapim mi, yu mekim ol yet i bagarap long en. Na ol yet bai i pundaun long dispela hul ol i wokim.

⁹Bikpela bai i mekim olsem, na bai mi amamas long em. Bai mi belgut long em i helpim mi.

¹⁰Na bai mi tenkyu tru long God na tok olsem, “Bikpela, i no gat wanpela olsem yu. Yu save helpim gut ol man i no gat strong, na ol man i strong tumas i no inap bagarapim ol.”

¹¹Ol man bilong giaman i sutim tok long mi long sampela pasin nogut mi no bin mekim.