SALMOS 35:1-11

¹TOTECO, xiquincamaijixnamiqui cati noca cualanij. Xiquintehui cati quinequij nechtehuise.

²Xijcui nochi motatehuijca teposhua, huan ximotanana para techmanahuiqui.

³Xijquixti mohacha cati ica titatehui, huan xiquinojtzacua cati nechtepotztocatihualahuij. Huan techilhui: “Na nimitzmaquixtis.”

⁴Ma pinahuaca huan ma mocuapoloca cati nechtemohuaj para nechmictise. Ma mocuepaca ininchaj ica pinahualisti cati quinequij nechchihuilise cati fiero.

⁵Quej se ajacat quihuica tasoli, iilhuicac ejca TOTECO ma quintojtocatiya cati nechcualancaitaj.

⁶Ma onca tzintayohuilot ipan iniojhui. Ma talxixitaca campa nemij para ma huetzica, huan nopa ilhuicac ejquet ma quintepotztocatiyas para quinmictis.

⁷Pampa masque amo teno nijchijtoya, quitalijque se taquetzti para nechmasiltise. Quixajque se ostot para ipan ma nihuetzi.

⁸Ma quintalochajsi se hueyi tequipacholi. Ma masica ipan nopa taquetzti cati inijuanti quitalijque huan ma motzontamiltica.

⁹Huajca quena, na nipaquis ipan TOTECO. Nijpiyas paquilisti pampa TOTECO nechmaquixtijtos.

¹⁰Ica nochi noyolo niquijtos: “Amo aqui seyoc quej ta, TOTECO. Tiquinmocuitahuía cati amo quipiyaj fuerza para masehualme cati tetique amo teno huelis quinchihuilise. Quena, tiquinmanahuía cati teicneltzitzi huan cati amo quipiyaj cati quinpolohua. Tiquinmanahuía inimaco cati quinequij quintacuijcuilise.”

¹¹Motananaj masehualme cati amo cuajcualme huan nechcualancaitaj. Inijuanti quitestigojquetzaj cati amo melahuac, huan nechtaijilhuíaj ica tamanti cati amo nijmati.