Buk Song 119:37-107

³⁷Helpim mi long givim baksait long ol samting i no gutpela. Mekim gut long mi olsem yu bin promis long mi.

³⁸Yu save givim promis long ol man i pret long yu. Orait mi laik bai yu bihainim tok bilong promis na mekim olsem long mi, wokman bilong yu.

³⁹Mi pret long ol tok nogut, na yu ken helpim mi bai dispela tok i no ken daunim mi.

⁴⁰Mi laik bihainim olgeta lo bilong yu. Pasin bilong yu i stret olgeta, olsem na yu mas givim laip long mi.

⁴¹Bikpela, yu mas soim mi olsem yu laikim mi tumas na yu ken kisim bek mi. Yu promis pinis long mekim olsem.

⁴²Helpim mi na bai mi inap bekim tok long ol man i tok nogut long mi, long wanem, mi bilipim tok bilong yu.

⁴³Strongim mi bai mi ken autim tok tru bilong yu long olgeta taim, long wanem, mi save bilip long stretpela tok bilong yu.

⁴⁴Bai mi bihainim lo bilong yu oltaim oltaim.

⁴⁵Mi traim long bihainim tok bilong yu, olsem na pasin nogut i no ken pasim mi.

⁴⁶Bai mi tokim ol king long tok bilong yu. Mi no inap sem long mekim olsem.

⁴⁷Mi belgut tru long bihainim ol lo bilong yu long wanem, mi laikim tumas ol dispela lo.

⁴⁸Mi tingim ol lo bilong yu i gutpela na mi laikim tumas. Na bai mi tingting oltaim long stretpela tok bilong yu.

⁴⁹Yu mas tingim gen dispela promis bipo yu givim long mi, wokman bilong yu. Dispela i mekim mi i bilip long yu.

⁵⁰Taim mi gat hevi mi bin kisim bel isi, long wanem, promis bilong yu i givim laip long mi.

⁵¹Ol bikhetman i bin tok bilas nogut long mi, tasol mi no save givim baksait long lo bilong yu.

⁵²Bikpela, mi save ting long tok bipo yu bin givim mi, na dispela tok i givim strong long mi.

⁵³Mi lukim ol man nogut i brukim lo bilong yu, na mi save kros long ol.

⁵⁴Mi stap longwe long as ples bilong mi na mi mekim ol song long ol lo bilong yu.

⁵⁵Bikpela, long nait mi save tingting long yu, na mi bihainim lo bilong yu.

⁵⁶Mi save bihainim olgeta lo bilong yu, na dispela i mekim mi i belgut.

⁵⁷Bikpela, yu tasol yu inap long mi. Mi promis long yu olsem, bai mi bihainim olgeta lo bilong yu.

⁵⁸Mi askim yu strong bai yu marimari long mi, long wanem, yu promis pinis long mekim olsem.

⁵⁹Mi tingim pinis wokabaut bilong mi, na nau mi promis long yu bai mi bihainim tok bilong yu.

⁶⁰Mi no ken wet. Mi hariap long bihainim lo bilong yu.

⁶¹Ol man nogut i traim long pasim mi bilong pulim mi i go long pasin bilong ol, tasol mi no lusim tingting long lo bilong yu.

⁶²Long biknait tru mi save kirap na litimapim nem bilong yu long ol stretpela tok yu mekim long kot.

⁶³Mi save wokabaut wantaim ol man i save mekim wok bilong yu na i save bihainim lo bilong yu.

⁶⁴Bikpela, yu save laikim tumas olgeta manmeri bilong graun. Skulim mi long olgeta lo bilong yu.

⁶⁵Bikpela, yu bin mekim gutpela pasin long mi, wokman bilong yu. Yu bihainim tru promis bilong yu.

⁶⁶Mi bilip tru long olgeta lo bilong yu, olsem na yu ken givim gutpela tingting na gutpela save long mi.

⁶⁷Yu no bin mekim save long mi yet na mi save lusim rot bilong yu. Tasol nau mi save bihainim tok bilong yu.

⁶⁸Yu gutpela tumas na yu save marimari long mi. Yu mas skulim mi gut long lo bilong yu.

⁶⁹Ol bikhetman i bin mekim planti tok giaman long mi. Tasol mi no gat narapela tingting. Mi bihainim olgeta lo bilong yu tasol.

⁷⁰Ol dispela man i no gat gutpela tingting. Tasol mi laikim tumas lo bilong yu.

⁷¹I gutpela tru yu bin mekim save long mi. Dispela i skulim mi gut long ol lo bilong yu.

⁷²Mi no save laikim mani olsem mi laikim lo bilong yu.

⁷³Yu yet yu bin wokim mi, na yu save was gut long mi. Yu givim tingting long mi bai mi inap lainim gut olgeta lo bilong yu.

⁷⁴Ol manmeri i save pret long yu bai ol i lukim mi na amamas, long wanem, mi bilip long promis bilong yu.

⁷⁵Bikpela, mi save olgeta lo bilong yu i stret tasol. Yu tingting long stretim pasin bilong mi tasol, na yu givim hevi long mi.

⁷⁶Yu promis pinis bai yu laikim mi oltaim na bai yu strongim bel bilong mi, wokman bilong yu. Orait nau mi laik yu mekim olsem.

⁷⁷Yu ken sori long mi nau, na bai mi kisim laip, long wanem, mi laikim tru lo bilong yu.

⁷⁸Ol bikhetman i save tok giaman na kotim mi nating. Mekim ol i sem tru long dispela pasin bilong ol. Tasol mi, bai mi tingting oltaim long olgeta lo bilong yu.

⁷⁹Wanem ol man i save pret long yu na ol man i save long lo bilong yu, ol i ken kam long mi.

⁸⁰Helpim mi long bihainim tru olgeta lo bilong yu, na bai mi no ken sem long pasin bilong mi.

⁸¹Mi wet long yu i kisim bek mi na mi bel hevi tru, na strong bilong mi i pinis olgeta. Tasol mi save bilip tru long tok bilong yu.

⁸²Mi was yet long lukim yu inapim promis bilong yu, na ai bilong mi i les tru. Na mi tok, “Wanem taim bai yu mekim bel bilong mi i kamap isi?”

⁸³Mi bagarap olsem olpela skin meme bilong pulimapim wain em ol i tromoi pinis. Tasol mi no lusim tingting long ol lo bilong yu.

⁸⁴Hamas taim yet bai mi wet i stap? Wanem taim bai yu mekim save long ol man i mekim nogut long mi?

⁸⁵Ol bikhetman i no save bihainim lo bilong yu. Ol i mekim sampela pasin hait bilong holimpas mi.

⁸⁶Mipela manmeri inap bilipim olgeta lo bilong yu. Ol man i mekim nogut long mi long tok giaman bilong ol. Olsem na mi laik yu helpim mi.

⁸⁷Klostu ol i bin kilim mi i dai. Tasol mi no lusim lo bilong yu.

⁸⁸Yu lukautim mi gut, long wanem, yu save laikim mi oltaim. Olsem na mi ken bihainim olgeta lo bilong yu.

⁸⁹Bikpela, tok bilong yu bai i stap oltaim oltaim. Em i stap strong long heven.

⁹⁰Yu save bihainim tok bilong yu oltaim oltaim. Yu putim graun i stap long ples bilong en, na i stap olsem na i no save surik.

⁹¹Yu yet yu bin tok na olgeta samting i stap olsem inap long nau. Long wanem, olgeta samting i save mekim wok bilong yu.

⁹²Sapos mi no laikim tumas lo bilong yu, orait inap long yu mekim save long mi na mi dai.

⁹³Mi no ken lusim ol lo bilong yu, long wanem, mi bihainim ol na yu mekim mi i stap laip.

⁹⁴Mi bilong yu tasol, olsem na yu kisim bek mi. Oltaim mi bihainim tok bilong yu.

⁹⁵Ol man nogut i hait i stap bilong kilim mi i dai. Tasol mi save tingting long olgeta lo bilong yu na mi no wari long ol.

⁹⁶Mi save nau, i no gat wanpela samting i gutpela tru. Tasol tok bilong yu i nambawan tru na em inap long olgeta samting long olgeta de.

⁹⁷Mi laikim tru lo bilong yu. Mi save tingting long en long san na long nait.

⁹⁸Lo bilong yu i stap wantaim mi oltaim na i givim planti save long mi. Na dispela i mekim mi i saveman tru na mi winim save bilong ol birua bilong mi.

⁹⁹Oltaim mi save tingting long tok tru bilong yu, olsem na mi kisim gutpela tingting tru, na mi winim ol tisa bilong mi.

¹⁰⁰Na save bilong mi i winim save bilong ol lapun, long wanem, mi save bihainim stretpela lo bilong yu.

¹⁰¹Mi surik long bihainim pasin nogut, long wanem, mi laik bihainim tok bilong yu tasol.

¹⁰²Yu yet yu bin lainim mi long ol tok bilong yu. Olsem na mi no lusim dispela tok.

¹⁰³Hani i save swit long maus bilong mi, tasol tok bilong yu i swit moa yet.

¹⁰⁴Lo bilong yu i save givim gutpela tingting long mi, olsem na mi no laik tru long olgeta pasin nogut.

¹⁰⁵Tok bilong yu i olsem lam bilong helpim mi long wokabaut stret, na i olsem lait bilong soim rot long mi.

¹⁰⁶Mi promis pinis bai mi bihainim olgeta stretpela tok bilong yu. Orait bai mi mekim olsem. Mi no ken giaman.

¹⁰⁷Bikpela, harim. Bikpela pen tru i karamapim mi. Yu mas mekim mi i stap laip olsem yu bin promis.