Asuki 13:37-50

³⁷Shegai Kashila̱ ka ꞌya̱nga̱sa̱ ta̱ Yesu a ukpa̱ kpam ikyamba i ne i shama wa.

³⁸“Ama a va̱, zuwai atsuvu mai a ili iꞌya tsa tono: adama a ili iꞌya Yesu yain, iꞌya i zuwai tsu tsa̱ra̱i ucimbusa̱ u unyushi u cingi gogo‑na. Mele ma Musa ma fuɗa ma gonuko ɗa̱ i woko dere wa. Shegai adama a Yesu, uza ɗa baci dem u wushuki wa woko ta̱ dere.

⁴⁰Kiranai, kawa ili iꞌya ntsumate n korongi ya gita̱ ta̱ n a̱ɗa̱. A dana ta̱:

⁴¹“ ‘Panai na, aza a majari, i shaɗangi n majiyan i kuwa̱! Kpaci ma yan ta̱ manyan ma roku a aꞌayin a ɗe, manyan ma ya kpa̱ɗa̱ uwushuku n ma, ko uza roku u tonuko ɗa̱ baci tani.’ ”

⁴²Wuta̱ ɗa Bulus n Bara̱naba a ka wuta̱ a kagata ka Kashila̱ ki, aku aza a Yahuda n Awulawa ushani aza ɗa a ka lyaka Kashila̱ kayala a tono le. Pini nala, Bulus n Bara̱naba aꞌa̱ri le ugbamatangusu asuvu a lyai kelime n uwushukusu n ukuna u shinga u Kashila̱. Aku ama yi a folo le a doku a yain kadyanshi a kaci ka ili i na yi n Ashibi a ɗa a ka tuwa̱.

⁴⁴An Ashibi a kyawain, ama a ilyuci yi ushani a tuwa̱ ta̱ a pana kadyanshi ka Kashila̱.

⁴⁵An aza a Yahuda a wenei kakuma̱ ka ama ki, a yan ta̱ malyon cika. A wishai Bulus kpam a ꞌyuwain ili iꞌya u danai.

⁴⁶Aku Bulus n Bara̱naba a dansai karara bawu uwonvo, a danai, “Eɗa u ka̱na̱i tsu gita̱ uyanka kuɓari ku kadyanshi ka Kashila̱, shegai i ꞌyuwain ka uwusha. Nala u wenike ta̱ an bawu i ra̱tsai i wushi uma u ɗa bawu wa̱ri n utyoku. Adama a nala, tsa a̱sa̱ka̱ ɗa̱ ta̱ aku tsu bana a asu u Awulawa.

⁴⁷Ili iꞌya Kashila̱ ka tonuko tsu tsu yain iꞌya na: ‘N zuwa ta̱ vu woko katyashi a asu u Awulawa, tsa̱ra̱ vu tuko iwauwi hal ubana likimba gba̱.’ ”

⁴⁸An Awulawa a panai nala, a pana ta̱ kayanyan aku a cikpalai kadyanshi ka Asheku. Aza ɗa a ɗanga̱sai adama a uma u ɗa bawu wa̱ri n utyoku a wushuku ta̱ n Asheku.

⁴⁹Pini nala, kadyanshi ka Asheku ka tamburai ko nte wa a uɓongu vi.

⁵⁰Aku aza a Yahuda a banai a asu u azapige a roku a ilyuci yi n aka a ɗa a ka na̱ka̱ tsupige. A zuwa le a ꞌyuwain Bulus n Bara̱naba, aku a gita̱ le mavura hal a loko le a kaɓon ka uyamba ki.