Hechos 13:37-50

³⁷Per xcuerpɨ Jesús ni gubíi gusbány Dios, quɨt guyuudxtini.

³⁸Pur ningui cadixteen lot par gacbeet dec pur laany anuu perdón xte de xtuldnɨ.

³⁹Irate ni reldilaaz Jesucrist anádeb perdón pur irate de duld ni quɨt nialee niacdeb perdón masquɨ baandeb zec ni rnabee ley ni bdeed Dios Moisés.

⁴⁰Ningui gulcualo laat, te quɨt chadiacát zec ni bcuaa de profet, te pur laadeb bcuaadeb:

⁴¹Gulcuadiag laat ni runtɨ burlɨ xtiidxa. Guldxalo ne gulnitlo, te pur lo de dxi xtentɨ gúna de cos ni axt quɨt chaldilaaztɨ masquɨ chúu ni guedgüenéni laat.

⁴²Deni bdiia Pablɨ cun Bernabé láani xquiudoo de bniety Israelqui, ax de bniety ni quɨt ná bniety Israel gunaabdeb favor lo Pablɨ te par chi riaa xmanqui ax ibíi chagüenérub laadeb ni benéb laadeb dxiqui.

⁴³Chiy chi bdiia de bniety laniudooqui, ziendeb güenald Pablɨ cun Bernabé, zeclɨ de bniety Israel ne zeclɨza de bniety zít ni rto Dios zecac de bniety Israel. Ax raipy Pablɨ cun Bernabé laadeb dec sutipnédeb ni azenuudeb nez güen xte Dios.

⁴⁴Chiguld chi biaa xmanqui, dxi ni rzilaaz de bniety, casi ira bɨnguɨdx bdxasaa par guindiagdeb xtiidx Dios.

⁴⁵Per chi guná de bniety Israel bɨnguilliú ni bdxasaaqui, ax gucnalaazdeb parzi guzulo rniyádeb ne rniizadeb de mal diidx pur Pablɨ.

⁴⁶Chiyru sin dxiby xquel cuaby Pablɨ cun Bernabé lodeb, raipdeb laadeb: —Nidonidoote lot ná par idixteen de didxzaac xte Dios, laat ni nát bniety Israel. Per anre quɨt rcaaztit icuadiagtɨni, ax quɨt xo yáldtit guelnabány par chazy cun Dios. Pur ningui azotɨɨchnɨ de xtidxzaacniqui lo de bniety ni quɨt ná bniety Israel.

⁴⁷Te pur ziyquɨza gunabee Xtadnɨ Dios dunnɨ, chi guniiny tuby lat lo xquiitsny: Abzuuba liú zec bieeny par irate naciony, te par chuu iduibte lo guɨchliu chatixtiiu xa xquel chalee gac bniety perdón.

⁴⁸Deni bindiag de bniety ni quɨt ná bniety Israel ziy, chiy rzaclaazdeb guzulo rniideb dec güenquɨ ná xtiidx Dios. Ax irate de ni nungueld gap guelnabány par chazy nez lo Dios, güeldilaazdeb xtiidxny.

⁴⁹Ziy xquel brɨɨch de didxzaac xte Dios iduibte nezqui.

⁵⁰Per de bniety Israel guludiidxacdeb de bniety gunaa ni ná mazru bɨnyudoo ne ni mazru sac láani guɨdxqui cun de bniety nguiu ni mazruza sac par guzunalddeb Pablɨ cun Bernabé axtquɨ guléedeb laadeb nezqui.