Apostolo 28:4-20

⁴E huriki a tahotanga ri masia a mata i tavore na limane Paulus, lakea ri vata, ri ta maea, “A bakovi iea, a bakovi ni rabalaki a viri! I uka ma i vurua na dari, pali a vure ne hita, a rana e ‘Nipelekado’, i koi ia ge mahuri.”

⁵Pali e Paulus i puraki vurokia na limana a mata, i voro rikea na kanono, i uka ma i vurea a matana.

⁶E huriki a taho tanga ri davea e Paulus ge vaki a limana, o ge boru puru ge mate. Ri dava, dava i uka ma ri masia tara maki ge bele vona, lakea ri palelea a ngavane ria, ri takia ta ia a vure.

⁷A bakovi dagi tara na bodu, a rana e Publius, i tahoka a malala vona tabukoi na hini mi huru dili vona. I tagui mia, lakea mi made turana na parava i tolu.

⁸E tamana i giloa i mahita na kiri, a vuhuna i rongo a kaina, i koko pereo. Lakea e Paulus i gosia, i vasileki, i ru langa a limana vona, i vakamahuria.

⁹Muri e huriki lobo na bodu ri tuli valai ne Paulus e huriki ri giloa, i vakamahuri ria.

¹⁰Ri habi tavula a maka maki ne mia. Muri, na tahuna ta mi gi malaga, e huriki a tahotanga ri togo mia, ri habi tavula ne mia a maka mahala, ri vakarike a maka maki ni kani mi gi kani laho na marava.

¹¹Muri na keva i tolu mi rike na aga ne huriki a Aleksandria, a rana e “Vure Boge”, e Kastor e Poluks. A aga iea i kapiloho vonga na bodu na tahuna na malangia.

¹²Mi nunu lakea na tanga dagi e Sirakius, mi dili vonga, mi made na parava i tolu.

¹³Mi malaga vonga, mi vano mi bele na tanga dagi e Regium. Na parava muri a vilu i vakatubu ni pori valai tano. Muri na parava i taku mi bele ne Puteoli.

¹⁴Mi matavisi vonga ranga kabukabu, ri taki mia mi made turane ria na parava i polorua. Muri mi lakea o Rom.

¹⁵Na tahuna e huriki a kabukabu o Rom, ri longo a velenga ne mia, ri malaga rike taku, ri valai ri gi tagui mia. E huriki ranga ri malaga na Mada ne Apius na tanga ni gale ‘A Roho i Tolu na Mosi,’ ri valai. Na tahuna e Paulus i matai ria, i vivi hateka, i kavurikea a Vure.

¹⁶Na tahuna mi bele o Rom, ni taki e Paulus ge made kikeri turana tagari ge tagaria.

¹⁷Muri na parava i tolu e Paulus i gale palupu e huriki a matakari ne huriki a Iuda vonga. Na tahuna ri vapopo, e Paulus i taki ria, i ta maea, “Mua o huriki a turagu, iau i uka ma ratea tara naro ge hale ne huriki ne hita. I uka ma a longotaroa tara vilo hosi ne huriki e tubune hita. Pali iau ni lakavu tavula o Ierusalem, ri habi iau ne huriki a Rom.

¹⁸Ri nana lobo iau, i uka ma ri masia tara naro hale ga ratea ga mate vona, lakea ri ngaru ni vakapagitala iau.

¹⁹Pali e huriki a Iuda ri koi, lakea iau a taki a ngaru ni pesi na matane Kaiser. Pali iau a uka ngava ga padi virihi e huriki a viri nau vona.

²⁰Na naro iea kunana a nana ta ga matai mua ga ta turane mua. Iau ni kolotata maea na sen, a vuhuna a muri ne Kristo, ra viri e huriki a Israel ri pasimata vona ge valai.”