Apostolo 11:12-29

¹²A Hanu Kiripiripi i taki iau nahea ga loho vagorigori, ga vano kunana turane tou. A murimuri ala polotara nga, ria ranga ri vano turagu, mi dili na ruma na bakovi iea.

¹³I vakalongo mia vona a agelo na Vure i bele vona na ruma, i takia, ‘O rudu ranga viri ri gi lakea o Iopa, ri gi matakanea e Simon, a rana tara e Petrus, ri gi takia ge valai.

¹⁴Bara i takia vomu tara ngava ge korimule ioe turana kabu vomu.’

¹⁵“Na tahuna a vakatubu ni ta, a Hanu Kiripiripi i dili ne ria. I manga a hini i dili ne hita muga.

¹⁶Muri a longovisia a ngavane Bakovi Dagi i takia, ‘E Ioanes i vahilolo e huriki na naru, pali iau bara vahilolo mua na Hanu Kiripiripi.’

¹⁷Hosi si luhoi torea e Isu Kristo a Bakovi Dagi, lakea a Vure i habi a Hanu Kiripiripi ne hita. Pali ria ngane ri luhoi torea e Isu, a Vure i habia a Hanu Kiripiripi ne ria. Pali iau e rei iau, ga hatekakaria a Vure nahea ge habi a Hanu Kiripiripi ne ria?”

¹⁸Na tahuna ri longoa a nitana, ri uka ngava, lakea ri kavurikea a Vure, ri ta maea, “Ngane si lohoka vona e huriki a bakovi i uka ma ria a Iuda, ria ranga a Vure i ngaru ria ri gi pulo a vilone ria, ri gi bole a nimahuri vakaroro.”

¹⁹Na tahuna e Stepan ni rabalaki, ni rata hale e huriki ri luhoi torea e Isu. Lakea ri ha viliha, ri lakea o Ponesia, o Saiprus, o Antiok. Na tahuna ri made na tanga nga ri vakalongo a Velenga Kamumu ne huriki a Iuda kunana.

²⁰Pali e huriki a bakovi ranga, a bakovi o Saiprus, a bakovi o Sirene, ri luve o Antiok, ri vakatubu ni vakalongo a Velenga Kamumu ne Isu Kristo ne huriki na tanga iea, i uka ma ria a Iuda.

²¹A nitora ne Bakovi Dagi i tabuli ne ria, lakea e huriki ala kupo ri luhoi torea e Bakovi Dagi, ri pulo a vilone ria.

²²A velengane ria i bele ne huriki a tara ne Kristo o Ierusalem, lakea ri rudua e Barnabas i lakea o Antiok.

²³Na tahuna i bele, i vivi, a vuhuna i matai a Vure i rata kamumu ria. I vara ria ri gi habi a hatene ria ni ramai e Bakovi Dagi, ri gi pesi tora.

²⁴I rata mavonga a vuhuna ia a bakovi kamumu, i luhoi tora hatekea a Vure, a Hanu Kiripiripi i leho tora turana. I kori e huriki ala kupo vonga ri dili na tara ne Bakovi Dagi.

²⁵Muri e Barnabas i lakea o Tarsus ge matakanea e Saulus.

²⁶Na tahuna i matavisia i turea, ru lakea o Antiok. Ru made vonga na pida i taku, ru tovo e huriki ala kupo. I vonga o Antiok e huriki a murimuri ni gale visi ria a Kristian.

²⁷Na tahuna iea, a propet ranga ri pe e Ierusalem, ri puru valai o Antiok.

²⁸A turane ria tara, a rana e Agabus, i dili vona a Hanu Kiripiripi, i pesi rike, i ta propet vona a pago dagi ta ge bele na tabeke lobo e Rom i matakari. A pago iea i bele na tahuna a hariki e Klaudius i matakari o Rom.

²⁹E huriki a murimuri ri longoa a ngava ne Agabus, lakea ri varodo a ngava ri gi ru palupu a moni, na ningaru ne ria takutaku, ri gi vakaru a kinori lakea ne huriki a kabu o Iudea.