APOSTOL 13:31-40

³¹Galili raang taitah Jerusalem khuapui tai Ama khatei khua a tlawng lai hrah pawhe sahlo takhei ning hlupui chung cawh aa hmuh. Atoheh aaning sahlo cawh kaa mingphing sahlo letah Ama a hnikhuipaw a cang he.

³²Atoheh ma thawngchawbia cawh kaa ca ching he. Khazing tei kaa mapaw sahlo bia a kangpaw he khah,

³³aa sawtei leh a cangpaw kaaning khahei Zisu a pathonah thong khei, a tlingsah myca. Reithainah Hlaw cabu bihningnah letei a ciapaw hrakhei, ‘Nama cawh ka sawcapaw na cang; atoning heh na Paw ka cang my ca.’

³⁴Khazing tah Zisu cawh thihnah taitah patho kaw ka, thu by a be tahpaw cawh ma hrahei a reihlangpaw a cang: ‘David letei bia ka kangpaw a pathaipaw le bonghnang a cangpaw cawh nama ka ca pae a,’ tah a cang.

³⁵Ma hraco kaw hringpaw letah a rei vypaw cawh, ‘Nama taco na Mehpathai heh thuh sá bei ceh,’ a tah.

³⁶David taco Khazing rai khah a chaitlung tai hre ka, thi ka, a mapaw sahlo khakhei phung he ka, a rawh cawh a thu.

³⁷Canghrasala Khazing tei thihnah taitah a pathopaw taco thuhnah khah phah be.

³⁸Macawtaco ka uny sahlo, Zisu a thongtah sua ngethainah kong heh naaning kha ka reipaw a cang tahpaw heh naa hni rua pawtah ka du.

³⁹Ama a thongtah, a zingpaw maikaw cawh thaicangsah he ka, Moses phungbia tei a luasah khy ly pawhe suanah taikhei aa lua khy thlu.

⁴⁰Araering my lo, Khazing khuavang sahlo tei aa za reipaw khah naa cung letah tlungsah khe lo.