Aposotolo Adi Hewau 7:5-27

⁵Nige ena oea begana i mosei, nige aena ena aba utuutuena, nige ariariri: taiede ia i ribahesunumaauri, ia sora nige natuna, i ene abo i mosei enana, eo ia tumanayao enadi hinage.

⁶Eaubada i ribalau ina doha, i ene ia tumanayao oea udoi eai abo se mia; isi abo se toaidi, eo se hepaisoaidi, eo borimai handere hasi abo se hebaaeadi.

⁷Eaubada hinage i ene, ‘Eanua wa isi se hepaisoadi wa abo sora ea hegirudi: abotai abo se lulage ina dimo eai ta, egu heaheari eai abo se lau.’

⁸Peritome laugagaeona ia i mosei ia arinai: Aberahama Isaako i hetubu, asubena hehaligigi‐haionana eai abo hinage se heperitomei; Isaako hinage Iakobo i hetubu; eo Iakobo tubudayao saudoudoi‐labui i hetubudi.

⁹Tubudayao Iosepa se aiaromagigiriei, ia abo se uneunei, se laei Aigupito eai; na Eaubada mo ia maena.

¹⁰Ena nuadubu gamagamagari aridi eai Eaubada ia i hemauri; hinage lolona eo sonogana i mosei ia arinai Parao Aigupito wasawasana matana eai; Parao Iosepa abo i hetoro, Iosepa abo Aigupito edi gavana eai i lau, eo Parao ena numa tanuagana eai ie lau hinage.

¹¹Aigupito gamagaridi eo Kanana oeadi hinage, guriam lailai aridi eai ie tubu, se nuadubu ariri: tamadayao aiai nige adi aba lobaina.

¹²Iakobo aiai wasana i ataiei, Aigupito eai edi masuri se hesaeauri, arinai tamadayao i hetamaribagunaidi se lau.

¹³Edi lau helabuina eai abo Iosepa iabom i hemasarahauioi ena tataoyao aridi eai, Iosepa ana bogao hinage Parao abo se heita.

¹⁴Abotai abo Iosepa i hetamaridi se lau tamana Iakobo se heribayama, maena ana bogao gamagaridi, tataodi tatao‐haiona‐se‐mate saudoudoi‐haligigi hinage;

¹⁵arinai abo Iakobo i dobi Aigupito. Nei eai abo ie mate, ia eo tamadayao,

¹⁶abo se baheuioidi se laedi Sekema eai, se toredi bousa eai wa Aberahama moni arinai i uneauriyao Emora nanatunayao aridi eai, Sekema eai.

¹⁷“Huiana Eaubada Aberahama i ribahesunumaei wa i hanahanauma, tatao se hetadada ariri Aigupito eai

¹⁸i lau e edi wasawasa esau ie tubu, ia Iosepa nige i nuatuwatai.

¹⁹Ia ada bogao wa i abibaaeaidi, tamadayao i hetaladuidi nanatudiyao gagiridi se gabagabaedi, ata si mauri.

²⁰Nei huia ne Mose se labasi, ana ao i lolo ariri Eaubada matana eai. Ia nawalai haiona numa eai se hemahemadoyamui;

²¹ia se gabaeyao wa, Parao natuna siu i abiisiniyama, abo i labahai doha himage ia natuna mamohoi.

²²Aigupito edi sonoga gamagamagari Mose i ata heohidio; ena riba eo ena laulau hinage aridi eai i adidiri ariri.

²³“Ena borimai tatao‐labui‐se‐mate se ohi, ia nuana bena i lau ana bogao i itauioidi, Isaraela nanatunayao wa.

²⁴Ia matana eai esau se abi‐baaeai, ia abo i sagui, tau se hebaaea wa i hemauri, Aigupito tauna mo i unui.

²⁵Nuana eai i ene ena tataoyao abo se italobai, Eaubada abo i hemauridi ia nimana eai, na isi nige se nuatui.

²⁶Mara‐ie‐tom abo tatao labui se lululu, abo i taumasaraha bena i laubiriedi, i ene, ‘Tatao e, omi boga esega, aue saha au hebahebaaeauioimiu?’

²⁷Esau wa ehana i hebaaea Mose i heduiahalai, i ene, ‘Eai i ribaei oa ama tanuaga, eo oa tauhekirainomai eai u lau?