Aposoroo 2:12-31

¹²kiaa kiada varida pinaama nnikiaraida kaayau kumimakaida varida ngiari yapara ngiari yaparaida tunoo: Mo oyaivo dataamainno vainnee? tiravai.

¹³Tuduu rikiada vooyaano Yisuunnara kutaavaivee tuuyara raida tunoo: Iya kapikarai nnooriivaa nnaa kiada kumimakaida varidaida itaa kua kiaanoo, tiravai.

¹⁴Tuduu rikioo Petorooso ari seena vaidi kua kutaivaa varada nuairaiyaatama diitoo iya vuutaivaki dioo vainno kuaivaa kaayau gioonna kiaapu nuunauyaki pinaama kuaivaa tioo tunoo: Ni seena Yutayaiyaata ngia Yerusareema variaiyaatama ni kuaivaa rikiaatee. Aa na kua tinara aavaa tuqinnama rikiaatee.

¹⁵Aa ta aavau diaunnaiyara ngia tiiyara yaata utida kiaanoo: Vaa kapikarai nnooriivaa nnaa kiada kumimakakiaanoo. Ngia itaa kua kiaa kua ivo inna unnakuavaida kiaanoo. Aanna makee suaivo ikiatainno nninoo. Hama kapikarai nnooriivaa nnaa suaivo nniivaaraida ngia unnakuaida kiaanoo.

¹⁶Nnaaruaa vaidi forofetaivaa nnutuuvo Yuvueero aa ta makee iikiaunna kua aavaara tunoo:

¹⁷Anutuuqo tinoo: Fai suai nnaagiaiyauvaki na ataama iinaravaivee. Fai na ni Mmannasa Yoketaivaa mmuakiaa gioonna kiaapuuya kaayauma mminaravai. Mminai fai ngii raunna mmaapuuya ni kuaivaa kooyaa forofetaiya roosiima kiaa mmiaaravai. Fai vaidi karaasaiya ngiari avu tinniiyauvo hanigianai ari vookarai aataruuyauvaa teekiai yokovaiya ruvuaataiyauvaa taaravaivee.

¹⁸Kutaa, fai ii suai ivaki na ni mmoori vareera kiaatanna ngiaammuauya ni Mmannasa Yoketaivaa mminai teeda fai iyaatama ni kuaivaa kooyaa kiaaravaivee.

¹⁹Fai na ngiau aapu ari vookara ari vookarai mmooriiyauvaa iina mmataivaunnaata iinai taaravai. Fai na iino too kiauvootama ikiaivoota kaayau kioosuuvootama vainaravaivee.

²⁰Fai suaivo upisiino kuraagaivo kiau roosiima kookee kuainaravai. Aa mminnaa aayauvaa na tauraa iino too nnaagiai na Udaangaivaa ni suai pinaa ari vookaraivo nninaravaivee.

²¹Ii suai ivo nnino too fai gioonna kiaapu voovoono na Udaangaivaa niiyara aayanna tinai fai na inna vitee yoketaivau yapaanaravaivee, tiivaivee. Forofetaa Yuvueero itaa kua tiravai.

²²Ngia vaidi Isarairaayaso, aa kua aavaa rikiaatee. Vaa ngiengieenoo ivaa rikiada taavai. Yisuuva Nasareeta diaa vaidivai Anutuuqo ari yaagueeqaivaa inna mmuduu ivo Anutuuqaa mmoori ari vookara ari vookarauyauvaa ngii avuuyauvunu iinno Anutuuqo inna mmuduu uu mmooriivaa kooyaa ngii vitairavai.

²³Vaidi vooyaano Yisuunna vitada ngii muduu ngia inna ruputuateera ee-oo tida vaidi maisaiya mmuduu iya inna vitada yatari sagaivau haara kieeravai. Vaa Anutuuqo mmuaanaa tauraa ivaara yaata utuoo teerama kieeravai.

²⁴Ngia itaama inna ruputu kiooduu Anutuuqo putuuvakidiri inna tuduu kava diiteeravai. Anutuuqo tuduu mmamma nniitareeraivaata putiraivaatama pikioo kava diiteeravai. Putiraivo hama yopeema inna puaisa utuuvaara kava diiteeravai.

²⁵Nnaaruaa vaidi Davuitiivaano Yisuuva Anutuuqaata kua tuu kuaivaa tunoo: Na tauko ni Udaangaivo tupatupaa ni tasipama varivai. Gioonna kiaapuuya maisa mmooriiyauvaa sa ni iikiateeraivaara ivo ni yaaku yaadudainningiaa ni vainima varivai.

²⁶Ivaara ni ausaivo yoketaikiai na sirigaira kuaivaa kiaunoo. Vaidiiya putida oro varira yoosinnaivaki fai a hama ni vaidi kaanaivaa pikiee kuanaravai. Na aiyara mmuduuya ruee i mmoori vareera ngiaammuauvaa fai a hama ni pikinai na ivaki vaina uudainaravai. Ivaara na vaidivai na putinaraivaara hama yaata utirainna na kava diitaanaraivaara fai na faannaina varinaravaivee.

²⁸Vaa a tupatupaa varira aataruuvaa ni vitaakiannavai. Fai na i tasipama varino ni ausaivo kaayauma yoketainai na sirigainaravaivee. Yisuuva itaa kua tuuvaa Davuitiivaano tiravai.

²⁹Petorooso itaa kua kiaa kioo kava tunoo: Ni seenayaso, na ti rubuungaa Davuitiinnara kutaa kuavai kooyaa ngii giaa ngii minaravee. Ivo putuduu vaidiiya inna hau kieeravai. Aanna makee inna mmata nnauvo homo aa vainoo.

³⁰Ivoono forofetaa vaidivai varioo Anutuuqo kua kiaa teerama kioo kuaivaa yaagueeqa kuaivaa tasipama tuuvaa rikieeravai. Anutuuqoono Davuitiinna oyaivakidiri diitaanaraivaa fai Davuitiinna roosiima kieetavai yapaanaraivaara kua yeena rau kieeravai.

³¹Kua yeena rau kiooduu Davuitiiva Anutuuqo nnaagiai iinaraivaa too Anutuuqo mmataama kioo vaidiivo kava diitaanaraivaara tunoo: Vaidiiya putida oro varira yoosinnaivaki ivo hama inna vaidi kaanaivaa pikioo kuaivai. Inna mmammaivo hama uudaivaivee. Davuitiivaano itaa kua tiravai.