Aposole 1:11-26

¹¹Dolapome dokaita lamaiyoo, “Galili tange akali nyakama, aipuma kaitinya kandalyoo kalyamipi? Jisasa nyakama-pipa kataminopa epapu Goteme kaiti-kisa lanyalamo kanjimino, Jisasa mendai dokoaka pamoli pyoo dee ipatana,” leambi-pyaa.

¹²Dokopa dokaita Olipimanda katao Jetusaleme pilyiami-pyaa. Olipimanda doko Jetusaleme tengesaIsataele dupame Sambasa giinya kaitini tengesa paengema opale.

¹³Jetusaleme pyakamatala anda namba pyoo petae palo kisa mendenya paleamino ongonya kolalyiami-pyaa. Pitapi, Jonepi, Jemesapi, Endutupi, Pilipapi, Tomasapi, Batolomyupi, Matyupi, Aopiasa ikiningi Jemesa dokopi, SaimoneSelote dokopi, Jemesa ikiningi Jutasapi dutupa dokonya kateami-pyaa.

¹⁴Dokaita pitakapi, enda mendapuapi, Jisasa endangi Matiapi, baanya kaiminingi dupa-pipa koteaka lao mona mendai paliuu awapa loma soo kateami-pyaa.

¹⁵Gii mendepa masoo miningi kaiminingi andate mendai-kisa dee kingi ita lapoma jowapi mende kambu pyao kateaminopa Pitame dupanya kaina dokonya toya katapala dapa lea-pyaa:

¹⁶“Kaimia paluma, wamba Oli Sipitisa dokome akali Dapitinya kambunya lungu piamo doko pepa pyapae silyamo. Sipitisa dokome Jisasa anjala epeamino akali dupa kaitini laitaka piamo akali Jutasa kandao lea-pyaa. Pepa pyapae doko kiningi jepengena, indupa kiningi jetelyamo.

¹⁷Jutasa doko wamba naimanya mende naima-pipa awapa kalai lautao piamana,” lea-pyaa.

¹⁸Akali dokome koo kalai piamo dokonya muni nyiamo dokome yuu mende sambea-pyaa. Sambapala baa aiyombame pyakatala kainanya tungutala baanya ingi dupa pitaka kolao epea-pyaa.

¹⁹Jetusaleme kateamino endakali dupa pitakame dopa piamo doko sepala nyakamanya pii lengeli pyoo yuu doko kenge Akeletama leami. Tenge doko Taiyokopausa lenge.

²⁰Pitame lao pituu, “Gotenya pii lapae doko Losuu Wee dupanya dapa lapae silyamo: ‘Baanya ee anda yuupi dupa mee sina. Akali mende dokonya nao nakatenana,’ lapae silyamo. Dee pii mende silyamoaka: ‘Baanya kalai isoo pingi doko akali waka mendeme nyinana,’ lapae silyamo.

²¹“Dopa lapae silyamo dokonya akali mendeme Jisasa malunya sakateana lao naima aposele dupa-pipa tole pyao pii doko panao lao katapenge jilyamo. Kamongo Jisasa naima-pipa awapa payamanoli pyoo payamano akali dupanya mende katapenge jilyamo. Joneme Jisasanya kaimbu pyakamaiyamo gii ongopa kandasoo, Jisasa naima-pipa kateamanopa Goteme baa ketae lanyiamo ongonya e tete tuu lao naima-pipa awapa payamano akali dupanya mende katena lamana,” Pitame dopa lea-pyaa.

²³Dopa lateamopa dokaitame akali mende nyemana lao lapoma makande miniami-pyaa. Akali mende Josepe Basapasa lenge-pyaa. Baanya kenge mende Jasatasa lenge-pyaa. Akali mende doko kenge Matayasa lenge-pyaa.

²⁴Dokaitame akali olapo makande minatala mendai mende katena lamana lao loma soo pituu, “Kamongo, embame endakali pitakanya mona kandenge. Jutasa baame aposele kalai doko yakinatala baa tangenya yuu pupenge dokonya patea. Embame akali alaponya mende Jutasanya panda nyoo aposele kalai doko nyoo pina lao yapao nyepate doko embame naima-kisa panasepe,” dopa lao loma siami-pyaa.

²⁶Loma sepala dokaitame kana yakane dupa pyasoo makande piaminopa aposele kalai doko Matayasa-kisa epea-pyaa. Epeamopa baa aposele kingi ita mende-kisa dee mendai dupanya konda pia-pyaa.