Aposol nup meme 20:28-38

²⁸“Kembunöŋ nanŋi sepŋi mokoba miaŋön könagesöurupŋi bohonŋini meiga buŋaŋi ak teközei, iŋini mönö i lama ewö galöm köla köyan köl eŋgiba malme. Uŋa Töröŋi yaŋön nanŋak nup mi al eŋgiyök. Miaŋgöra iŋini mönö nanŋini aka Kembugöreŋ lama kambu yeŋgöra galömŋini mem aŋguba malme.

²⁹Nöŋön anbiga miaŋgö andöŋe ambazip kanjamŋinambuk mi kiam kalŋi ewö eŋgö sutŋine asuhume. Yeŋön asuhuba lama kambu eŋgöra qahö möta piakŋi aka laŋ kaba eŋgöhöme, mi mötzal.

³⁰Nanŋini sutŋineyök azi tosatŋan wahöta kinda Jisös gwarekurupŋan göraŋe anmegöra öröm eŋgiba muneŋ keu jiba malme.

³¹Miaŋgöra iŋini mönö uruguliguli mala keu ki uru könömŋine ala mötmörime: Nöŋön (yara) yambu karöbutkö dop suŋgem asak qambaŋ keuŋi keuŋi mi iŋini mohot mohot qösösök (qörörök) kusum eŋgiba malbiga imbilni erök.

³²“Nöŋön merak iŋini Anutugö böröŋe al eŋgiba kewö jizal: Yaŋgö Buŋa keuŋan mönö kalem möriamŋi indela köyan köl eŋgimakŋa. Anutunöŋ köhöiba uruŋini naŋgöba möhamgöiga ölöp köhököhöi miwikŋaiba mutulaŋgömakŋe. Iŋini Anutubuk lapingögetka alaurupŋi pakpak tök kutum eŋgiiga sarakŋi akzei, mönö yeŋgö sutŋine aŋgota dum tatatŋini memba oyaeŋkoyaeŋ aka malme.

³³Ni eŋgöreŋök kungö guli jalö me moneŋ opo mi qahö buŋa qem aŋgumamgö möta malal.

³⁴Ni aka suŋgurumurupnan yuaigöra osiba malini, mi mönö nani böröni kiaŋön nup memba miwikŋaiba malal.

³⁵“Mi pakpak aka memba silik ölöpŋi kondel eŋgial. Iŋini mönö mewöŋanök nup memba malme. Mewö mala ambazip löwöriba nup memegö osizei, mi ölöp köyan köl eŋgiba malme. Nup megetka ölŋi ahuiga Kembu Jisösgöreŋ keu ki mötmörime: Yaŋön nanŋak keu kun kewö jiyök, ‘Inap yuai buŋa qem aŋgugetka teköba pömsöm qeiga öne malmemö, tosatŋi yeŋgöra yuai kalemŋina eŋgigetka Anutunöŋ likepŋi meleŋniga oyaeŋkoyaeŋ akŋe.’ Mewö.”

³⁶Polnöŋ keu mewö jiba eta simin köla körek yembuk Anutu köuluköyök.

³⁷Köuluköiga körek yeŋön amburereŋ aka urusahöt qeba aŋgum waŋgiba numbuŋi yöhötim neget.

³⁸Polnöŋ mutuk keu kun kewö jii mötket, “Iŋini nöŋgö jesöŋgöröni kunbuk qahö ekŋe.” Keu mewö möta miaŋgöra wösöbirik öŋgöŋgöŋi möta kinda waŋgita waŋgenöŋ öŋgöba yaizökzök jiba umbulget. Mewö.