Aposol nup meme 11:23-29

²³Anda aŋgota Anutunöŋ kalem möriamŋi ambazip eŋgii ölöwakeri, mi jeŋan eka möri öŋgöi söŋgaiba qambaŋi kewö jiyök, “Iŋini mönö körek pakpak uruŋini qezaköba köhöiba Kembubuk qekötahöba kinme.”

²⁴Barnabasnöŋ azi ölöpŋi aiga Uŋa Töröŋan uruŋi kokolak qeiga uruyahöt andö qeba uruŋi jömuk miaŋön Jisös möt narim waŋgiba malök. Miaŋgöra ambazip gwötpukŋan uruŋini meleŋda Kembugö kambunöŋ toroqegetka qariyök.

²⁵Barnabasnöŋ Antiokia mosöta Sol jarumamgöra Tarsus taonöŋ anök.

²⁶Anda miwikŋaiba waŋgiri Antiokia sitinöŋ kayohot. Kaba miaŋgöreŋ mohotŋamŋire (yara) yambu mohot jömukŋanök mala zioz nup memba uruŋini meleŋgeri, mi kambuŋi kambuŋi köla kusum eŋgiyohotka ambazip gwötpukŋan mötmöt memba urukönömŋine alget. Antiokia ambazipnöŋ mutukŋi könahiba gwarek qetŋini Kraistkö alaurup (kristen, Kraistkö buŋa) qeta malget. Mewö.

²⁷Nalö miaŋgöreŋ kezapqetok ambazip tosatŋan Jerusalem mosöta Antiokia sitinöŋ eta kaŋgotket.

²⁸Yeŋgöreŋök kun qetŋi Agabus mi wahöta Uŋa Töröŋan sölölöhöi buzup keu kewö jii mötket, “Bödi ketaŋan asuhuba gölmeŋi gölmeŋi dop köla ahöma.” Mewö jiiga miaŋgö dop sisa kiŋ qetŋi Klodius yaŋgö galömkölköl nalöŋe asuhuyök.

²⁹Mi asuhuiga gwarek yeŋön mindiriba urumeleŋ alaurupŋini Judia prowinsnöŋ malgeri, mi naŋgöm eŋgiba mindimindiri naluk ketaŋi alget anmapkö keu jöhöget.