Aposol 8:13-33

¹³Ngan le Simon tani in ya taunu itara lono medana pang Yesu, le Pilip irriu lapau. Motong la itoo Pilip ye ni mai i le imot yo ipa pang ye nga, inbe ikamata mos maimai matana matana yo Pilip iyei a iyei ben tarkilanga panga nga, ngan le itakrai ye.

¹⁴Ye kene tani in di aposol ke Yesu yo tiyepe Yerusalem nga, ngan tilongo betanga be di tooltool ke Samaria ngan titara lodi medana ye betanga ke Maro oo. Motong la tiwanga Pita iye Yowan a tila pang ye di.

¹⁵Le nga Pita iye Yowan tina ngan tipa a du pombe, motong la yaru tipatarau pang Maro be ikaua Amunu Silene pang di tooltool ke Samaria nga,

¹⁶yesoo Maro Amunu Silene isi ye di tiao. Ngan di tooltool yo du tirriu di muku nga, ngan tirriu di ye Tool Mai Yesu ene leu.

¹⁷Le nga Pita iye Yowan tina tipatarau a imot, motong la yaru titar baedi lo ye di tooltool tina ngan podi, le taun tikaua Maro Amunu Silene.

¹⁸Ye kene tani in Simon, yo pidipidana i, in iyepe lapau, le ikamata di aposol ru ke Yesu tina yo tipaloko baedi lo ye di tooltool tina ngan podi, ngan le tikaua Maro Amunu Silene nga. Le nga ikap pat ke yimoongoo so a ila be la ikap pang di yaru, inbe iyei ne,

¹⁹“Au i lok be angru kakaua gurana in pau lapau, a nen be apaloko baek lo ye tool atu pono nga, ngan ole ikaua Maro Amunu Silene.”

²⁰Motong la Pita iwete panga nen, “Ona, ong i, ole Maro igarungong le kupa ye pat kiong nga le kulem, yesoo so yo be Maro ya taunu ikauu ye lo ponana ki i, in lom tar be ole kuyimoo ye pat.

²¹Ong i lom iken dook mata ye Maro matana tiap. Ngan nen le ke be se kuyei emam be amyong tayei urata ke Maro yo am amyeii, in tiap.

²²Le kuportaka lom, inbe kuwala murim pang dada dook tiap yo nen nga. Inbe kupatarau pang Tool Mai a kutoru, a nen ngan be lono dook mata nga, ngan igiri dada dook tiap yo iken lom nga.

²³Ngan au i awete nen nga, yesoo bong akamatong, ngan ong i matam gorengana mata ye so yo Maro ikauu pam i, inbe noonoo kiong iparamong le ke be kuyege tiap.”

²⁴Pita iwete panga nen a imot, motong la Simon tani in iyei ne, “Atoo, be nen ngan angru kapatarau pang Tool Mai yau, a nen ngan so yo angru kawete pau ye nga, ngan o ke be pombe pang yau tiap.”

²⁵Ngan Pita ye Yowan tina tikaua bingi pang di tooltool ye so yo Tool Mai iyei pang di yaru nga, inbe tiwetewete pang di ye betanga ke Maro a imot, motong la yaru timulu a tilo pang Yerusalem. Ngan ye kene yo yaru tipa a be timulu a tilo ye in nga, ngan le yaru tiwetewete bingi dook mata pang di tooltool ke malala kakase alunu yo ke Samaria nga.

²⁶Di suru tina ngan tilo, motong la bangabangana ke Tool Mai atu isi le si iwete pang Pilip nen, “Ai, kumadit a kupa nen a kula pang ye dada yo ipa ke Yerusalem a idu pang ye malala mai Gasa i.” (Ngan dada tani in iken ye ni sorrakene.)

²⁷Motong la Pilip imadit tina ngan le ipa a itoo dada tani in a idu, ngan le du ipuske tool atu ke Itiopia yo tinin mata i. Ngan tool tani in titaru a iyei tool mai a matan kala depe ke pat ke Kandasi, garup yo iyei kuto mai a matan kala di tooltool ke Itiopia le imot i. Ya in ilo Yerusalem lo isung a imot,

²⁸motong la be imulu a idu pang malala ki. Le nga tool tani in iwur ye koror ki ke burungu yo asara tiyole i, inbe nga ikinkata rau ke Maro koonoo yo Esai i, in a idu.

²⁹Motong la Maro Amunu Silene iwete pang Pilip tani nen, “Kupa le kudu potai ye koror ke burungu ni.”

³⁰Motong la Pilip idada le idu potai ye koror tani, ngan ilongo tool tani yo ikinkatkata rau ke Maro koonoo yo Esai in nga. Le nga Pilip itoru nen, “Ai, ong i lom galanga ye betanga yo kukinkati i, in punu lapau, too tiap?”

³¹Ngan tool tani iyei ne, “Kumata be tool sa iwete nini betanga i punu pau tiap nga, ngan ole lok galanga ye belei?” Motong la iwete pang Pilip be irookoo a ilo lo iwur gigini.

³²Ngan betanga tani yo iken ye rau ke Maro koonoo a tool tinin mata tani in ikinkati i, in iwete nen: “Ya in iwete touo betanga siap. Ya in koom pakom dawa ben sipsip yo tirara be la tiraumate i, inbe taukan koonoo ben sipsip natunu yo tikauu be la tikot bulbulini i.

³³Ngan ya in tikan paseme, inbe ye kene yo lo ikodo dama ke di tooltool maimai ke karatanga betanga ye i, ngan le tikarata betanga ki dook tiap. Ngan nen le di tooltool ke be tipit di sasa ki tiap, yesoo ya in tiraumate a imata le yepongo ki ke tana i, in imot oo.”