Hechos 8:13-33

¹³Simón nɨjkulish kiztawane, Felipene ussa munta. Suasne usne Felipera kanpamɨzta. Felipe iztasparɨt kal kirɨt akwa, usne iztasparɨt.

¹⁴Ɨnintaruzne Jerusalén pɨpulura purara. Uspane Samaria awa Dios kaizta aizpa mɨarɨt piankamat kit Pedrorakas Juantakas ta ɨninñara.

¹⁵Samaria pɨpulura piannatpane, uspane Diosta paikuara, Diosta piantuz Sɨnam Izpulta sappanapa.

¹⁶Mama Sɨnam Izpulne usparuza pizna atchi. Anpat Jesústa nɨjkularɨt akwa, Felipene usparuza munninnara.

¹⁷Suasne Pedrokas Juankas uspa chihtɨ usparuza panamtuasmin, Sɨnam Izpulne usparuza piznara.

¹⁸Ɨnintaruz usparuza chihtɨ paanamtuasmin, Simónne Sɨnam Izpul usparuza piznamtu izta. Usne pial mɨlashit kit usparuza

¹⁹ka kaiznara: —Nawakas an iztasparɨt kal kin kiwaincha, na chihtɨ paaka, Sɨnam Izpul awaruza piznapa, kizta.

²⁰Suasne Pedrone ussa kaizta: —Up pialkas nukas parejuin karɨnazi. Nune Dios mɨlamtu aizpa pialkasa painash nil chi mintu.

²¹Nune Diosta pianchi. Aukasa sun kal kisachi. Diosne nu kaijchukin nu kwail mintu aizpa pian. Nu kishimtu aizpa nil chi.

²²Katmizna nune nu kwail kishimtu aizpa maiz kit chɨhkari. Diosta paikwatpa, nu kwail mintu aizpa kaijchura wat kulnapa.

²³Nane nu kwail kishimtu aizpa pianish. Pial kana kishimtu akwa, nune ñan miwara ɨshimtu.

²⁴Suasne Simónne ka sɨnkara: —Anpat Jesústa na akwa paikwarain, nu kaizta aizpa, sun nawa kimanpa.

²⁵Awaruza Jesúspa kainanarawane, Dios pit kaiznarawane, Pedrokas Juankas Dios watsal pit akkwan Samariawa pɨpulurakas kainana ɨilta. Suasne Jerusalén pɨpulura kailpailta.

²⁶Sun kitpane, Anpatpa ángelne Felipera ka kaizta: “Kuhs kit ɨmɨzti. Jerusalén pɨpuluras Gaza pɨpulura miwara ɨtpa.” An mine pul sura pɨnmu.

²⁷Felipene kuhs kit ɨt kit miwara etíope ampura wanmalta. An katsa ɨninmikane Candace Etiopía suras ashampa mikwara kiwainta, uspa pial watsanpa. Usne Jerusalén pɨpulura ɨra, Diosta wakpuj wain kit paikwan.

²⁸An ampune paiña sura kailtɨmtuara. Paiña carro caballo ɨmtuasmin, usne Isaías pɨnkɨh parɨt aizpa iztuara.

²⁹Suasne Sɨnam Izpulne Felipera kaizta: “Carro caballora kashara ɨt kit wanmakti,” kizta.

³⁰Kashara ɨt kit Felipne us Isaías pɨnkɨh iztu mɨra. Ussa mɨmara: —¿Nu iztu aizpa mɨmtukish?

³¹Ampune ussa kaizta: —¿Mizama mɨnapai? Mɨnminkas nawa kainarachi. Usne Felipera paikwara, uskasa carrora nut kit uznapa.

³²Usne Dios pit ka iztu ara: “Uspane ussa pɨrikukana mɨlta, piantana. Usne pɨriku pashpakana i. Pɨriku ash tɨtmumika ash tɨttane, usne aztachi. Uskas puñain ara.

³³Us kwail kitchikas, uspane ussa nil aizpa kiarachi. Mɨnainkas ussa kiwainarachi. Mɨnainkas paiña kwalpa paramanazi. Paiña kwalne ussa piantaara, an sukin uzmanpa.”