Aposol 27:9-26

⁹Ngan tina amkooi mosmos nen le ke alunu iman a ila, inbe lal maiyoko kidi Yuda ke sapanga ye kaningi in imot oo. Ngan nen le amlo ye lal yo be eng tani in imadit le dook tiap yege i, le nga Paulu ikap betanga pang di tooltool tina ngan nen.

¹⁰Iyei ne, “Di tamoto nga, kapalongo! Au i akamata nen, kumata le be takooi nookoot nga, ngan ole tapuske lal dook tiap, le ookoo kiidi ole perbe, inbe burum le so alunu la be ilene nga. Inbe idi nga ole tallede lapau.”

¹¹Paulu iwete nen, bong ngan tool turana bulbulini tani in ilongo betanga ki tiap. Bong itoo betanga ke koddenge ke ookoo, inbe ke ookoo tamana.

¹²Ngan launu tani yo amdau ye i, in launu dook mata ke be ookoo idau, inbe iko dook ye yoro, ngan tiap. Ngan nen le nga di tooltool yo tiyepe ookoo pono nga, ngan alunu la lodi be amkooi mulu, inbe amyege ni tani in a amla nga. Ngan lodi tar nen, be amkooi le dook nga, ngan ole amkooi a ampa so le la pombe ye launu san ke Kirit yo Pinik i, a nen ngan la amko ye yoro, inbe amnaia eng tani in nango le katen si ngan. Ngan launu tani in la isanga yoro le eng yo ipa ke sawa ngan tiap i.

¹³Amyepe nango, le nga karaka ipa surunu mosmos dook mata. Ngan nen le lodi tar be ole amkooi dook mata le amla ye launu tani yo tiweta i. Le nga tiyaua pat yo tikatte du iparama ookoo i, in se ete, inbe amkooi a amdada tana ke Kirit a amla.

¹⁴Ngan amkooi a amla le mooloo tiap, inbe yoro mai imadit le gurana san. Ngan yoro tani in ipa ke motmot Kirit kapala ki ke kono ni a ilong le dook tiap yege.

¹⁵Ngan tina ampuske eng nen nga, le nga amkapye be amrookoo kokor ye ookoo tani, inbe amsosala eng a amla, ngan tiap. Ngan nen le nga ampas le amdau leu, inbe eng isuru ookoo tani in a amdu.

¹⁶Amdu ngan le amkooi ke motmot mitiap yo tiwete ene ye Kauda in murini ke kono. Ye kene tani in du amko kasin ye muru ye motmot tani in murini, motong la amyei urata mai a amkapye be amyiti ookoo kase yo amyole in se ookoo mai pono.

¹⁷Le nga di loningi ke koddenge ke ookoo tani in tiyiti ookoo kase tani se ete se tipauu ye ooroo le imede, motong la tikatte rre le ipa ke ookoo mai tani in parmana, inbe tipauu ye le imede a be nen ngan iparama. Ngan titattadai be amkooi a amdu ngan le du amsauloko ye ululu yo iken tiek lono potai pang ye Aprika i, le nga tirau le ke ookoo tani, inbe ampas le amdau be eng isuram leu a amdu.

¹⁸Ngan eng tani in isuram a amdu nga, ngan dugu le kokor ki maimai leu le tina iwulam dook. Le nga ke tani in imot, inbe amlo ye ke san, motong la di loningi ke koddenge tani ngan timadit a tikatte burum kapala du tiek lono.

¹⁹Amkooi nen le ye ke tol ki, motong la di loningi ke koddenge tani ngan timadit a tikatte le ke ookoo ngan le ipa ye rre le so ki, ngan du tiek lono.

²⁰Ngan eng tani in isootoo pa nen a irau am nga, le nga ke alunu yo amkooi ye nga, ngan ke le bong tina yo kanakana nga, ngan le mala be amkamata touo ke le kanpitiki pitiap yege. Ngan nen le nga lomam tar nen, nga ole dook yam tiap, bong ole am le imot amllemam.

²¹Amkooi kaiye sokorai ye ke alunu, le nga di tooltool tikan touo so pitiap. Motong la Paulu tani in imadit lo ikodo kataunu kidi tooltool tina, inbe iwete pang di nen. Iyei ne, “Di tooltool kiau nga, kakamata koot? Ngan yo be kulkulunu nga, ngan kalongo kook le tayege motmot Kirit tiap nga, ngan matin nga le tapuske lal dook tiap i tiap, inbe so sa be ilene tiap lapau.

²²Bong nookoot nga ole awete pang nen, kin lomim mede leu, yesoo idi nga sa o ke be ilene tiap, bong ookoo leu la be ole ilene i.

²³Au i tool ke Maro, inbe asung panga lapau. Le bong katai a le muntu nga, ngan bangabangana ki atu isi le si ikodo ke gigik,

²⁴inbe iyei ne, ‘Paulu, kin kutattadai be! Ong in ole du kukodo dama ke Sisa ye ni ke karatanga betanga. Inbe kulongo, Maro ilongo pataraungu kiong oo, le ole iyei dada dook mata pang di tooltool le imot yo kuye di kakooi ye ookoo i nga, le o ke be sa ilene, ngan tiap.’

²⁵Le di tooltool kiau nga, ngan kin lomim mede leu, yesoo au i atara lok medana pang Maro be ole iyei so tina a pombe le imot ben yo iwete pau ye nga.

²⁶Bong be nen ngan ole eng isuru ookoo i a tadu le du isauloko ye motmot sa.”