29Le nga kin kakan kaningi yo di tooltool tiparoro pang di maro yo kai padodo, ngan be. Inbe kin kakan asara yo rara iken ye nga, too asara kapala yo di tooltool tikis guridi a be timmata nga, ngan be. Inbe kin kakapsap ye dada ke di kerenge be. Ngan kumata be kakap tutang dook le kayei dada tina ngan tiap nga, ngan ole dook mata san. Le betanga kiam nanga leu. Kayepe ye lo ponana dook mata.
30Motong la di tooltool tina ngan tiwanga di pai a tidu pang Antiok. Ngan tidu pombe, motong la tikiu di tooltool yo tigaua ye bareme ke Yesu nga, ngan man tiye di tigaua, inbe tikaua rau tani in pang di.
31Le nga kene yo di tooltool tina ngan tikaua rau tani in a tikinkati ye in nga, ngan le lodi ponana kaiye ye betanga dook mata yo tiwodo a tipamede di ye nga.
32Ngan Yuta iye Selas tina ngan di tapdi ngan di Maro koonoo lapau. Ngan nen le yaru tiwete betanga dook mata alunu kaiye pang di diedi kapala yo titara lodi medana pang Yesu nga, ngan be tipamede di ye.
33Ngan Yuta iye Selas tina ngan yaru tiyepe kaiye nango la Antiok ngo, motong la di diedi tina ngan tipamede di yaru ye betanga dook mata, a be nen ngan Maro ikaua lo silene pang di, inbe titar di yaru a timulu a tilo pang ye di tooltool yo tiwanga di a tisi nga.
Aposol 15
Aposol 15:29-33