29हे़क्केःल्ले़ नावाइत्लाओ सिदुङ्जभा चोःक्मनाबा चाहाॽ मे़जे़म्मिन्ने़ॽ, सामाक्खिॽआङ् मे़जे़म्मिन्ने़ॽ, हे़क्क्याङ् कुसित्ला यॽमना से़प्मनाबा सा मे़जे़म्मिन्ने़ॽओ॥ हे़क्क्याङ् चालाम्मानुआङ् एःक् वये़म्मे़ॽओ॥ अक्खे के़जोगुम्ने़ फाॽग्र नुःबाए के़जोगुम्लो॥ से़म्मुॽइरो॥”
30हे़क्केलॽरिक् खे़न् लिसि इङ्साबाहाॽ मे़धासिङ्ङाङ् एन्तिओक्को मे़गे़रे़॥ खे़प्मो खे़ङ्हाॽरे़ काक् नसानिबाहाॽ थिक्ते़न्नो मे़सुप्सुसिआङ् खे़न् सक्इङ्घङ्ङिन् हुक्मे़सुप्तुसिरो॥
31हे़क्क्याङ् खे़न् सक्इङ्घङ्लाम् आःन्छिङ्मा मे़घोःसुआङ् नसानिबाहाॽ साॽरिक् मे़सःत्ते़रो॥
32यहुदा नु सिलासिआङ् आबाङे माङ्निङ्वाॽपाःन् के़बाःप्पा वये़त्छि॥ नसानिबा फुॽनुसाॽहाॽ हाङ्हाङ् नु खुनिॽ नसाःन्नो के़धुम्बा चोःक्मासि फाॽआङ् खे़ङ्हाॽरे़ यरिक् पाःन्हाॽ मे़त्ते़त्छुरो॥
33खे़प्मो कुभा ये़न् वये़त्छिआङ् नसानिबा फुॽनुसाॽहाॽरे़ खिन्छिॽ नुःरिक्काङ् पेगे़त्छे़ॽओ लॽरिक् याङ्ना मे़बाङ्घु मे़देःसुसिरो॥