Aposeli 13:9-48

⁹Ia Saulo e ualasou vile lexe Paulo ne Uleenu Tavuna muꞌanaꞌana noxou, la anu mumatakisou Elimasi ne la muvikalanu aloxo ꞌo,

¹⁰“Nini satani ꞌolu. Nini itema sou naꞌoxo masuanu mimii laixe. Nini neꞌanaꞌana no anu ꞌilixo sou kalakalavoi ilou iisuiisu, mo nini namitema sou naxiuxiunu mii ane Tila muꞌoxonu manina ne sou naxalixu uxali kalavoi.

¹¹Mo namaisou vaimomo ꞌo si, la Tila xaviinu uluꞌe noxine la ieni utomu mo namaisou lamana vile la uasi maxuveeni sevile.” Xe alaxu vilesisi ꞌo la mii e loxo tamuxala isivoxoxu ne muneꞌe mutomu iou, la sou anu mukamuli itema vile sou lexe usuꞌulinu sou utetelisou no avolu mo usuꞌulinu sou utilau.

¹²Ioxe itema sou usaxilaꞌu laꞌolu mumaisou mii aloxo ne, la mukuluke no anu vaikala Tila la sou xavutalau muavuti sou mumuxamuxaxu tanu noxou Tila.

¹³Paulo iloꞌa ta mitema e mimulinu ne mutelo no lasipi meꞌa ne Paposi milai ne Peluxa aneꞌi mixolu no nano xalee lia tila ne Pamfulia, la Ioanesi e ualasou vile lexe Maluko ne muꞌumesiꞌa a lai ne sou mulivu mulai ne Ielusalemu.

¹⁴Io aneꞌi meꞌa ne Peluxa ne mole milai mixali ne Antioki anu muxolu no nano no xalee lia tila ne Pisitia. Xe no voxo Tavuna, la aneꞌi milai miꞌuna no taasou lalotu noxiꞌa ta Iutaia sou mixolu no lia.

¹⁵Ioxe aneꞌi miitisou Lavuku sou lapuloto noxou Mosesi xe vaikala ane ta mitema sou palomatana mikaukavunu. La iliꞌi sou ta tatila no ꞌa taasou lalotu noxiꞌa ta Iutaia ne mipalusou itema vile sou mulai muvikalaneꞌi Paulo ilou Valunavasi aloxo ꞌo, “Ta vivixe, nexi tamasaxa lexe ngingi nganeꞌe mo lexe mengi vaikala moseꞌi lailaixe, la ngapeletotosiꞌa ta mitemamexi no anu.”

¹⁶La Paulo mutulu la mutolosou avolu mulai noxiꞌa ta mitema sou lexe ixolu tasiau xo anu uvivikala. La sou anu musoko sou muvikala aloxo ꞌo, “Ngingi ta mitema sie Isilaeli, mo ngingi ta mitema ane ta Iutaia uasi ia ngalavusou ngalolotu ulai noxou ne, ngingi ngalomu uneꞌe noxilo.

¹⁷Ngingi ta Isilaeli Latauamengi xo Anu musosovosiꞌa ta ꞌiluꞌilusungengi mukalu, la muꞌoxoneꞌi sou milai mixolu ne Aixiputo mole mixali ta piena misevile, xe mukalu la sou anu molu mulivunixaꞌa no Anu xavi noxou sou milaa ne Aixiputo.

¹⁸La Anu mutavule tuꞌumaxu no anu ꞌilixo noxiꞌa mo musaxilaꞌa mumomomo loxo tauu ie itemaxu tamei no nano no xalee lia vitanisi.

¹⁹Xe Anu muavuti, la mualivulaneꞌi ta mata muxatele tamei ne Kanani. Io muꞌitalonu lialia ane ne noxiꞌa ta mitema ne Isilaeli.

²⁰La sou mimii ta piena muxali no nano no anu tauu ie itemaxu mavulovexa tamei mo mavulovexa taꞌuve (450). Xe iliꞌi no mine ta Isilaeli minoꞌu lialia ane ne mo mixolu no anu mukalu, la sou Lataua molu musosovosiꞌa ta mitema ane sou lexe itulu ta kisikisiꞌa sou iulaxuneꞌi ne mulai mutalo no mine itema sou palomatana Samueli muxali.

²¹Xe ta mitema miavuti la milinga sou itema vile sou uxali loxo aneꞌi iꞌa motuxu tuala vile. La sou Lataua mulosiꞌa Saulo e Kisi ꞌolu xe anu no anu mata noxou Beniamini. La anu muxali mutuxu tuala noxiꞌa la muxolu musaxilaꞌa mumomomo loxo tauu ie itemaxu tamei.

²²Ia Lataua muavuti la, la muxexeenu, io musosovosou Deviti sou muxali mutuxu tuala noxiꞌa. Xe Anu muavuti la muvikala lamana noxiꞌa aloxo ꞌo, ‘Eni exexeenu Saulo io esosovosou Deviti anu Iesi ꞌolu ne anu itema vile e Eni elavusou opoonu lexe ulai la anu umulimuli masaxa noxilo ukalusi.’

²³La sou Lataua mulosiꞌa ta Isilaeli Iesu itema sou pamauli ne loxo musakiinu vaikalasou. Lexe itema sou pamauli uxali noxou Deviti.

²⁴La sou no mine Iesu uxali uao, la Ioanesi e itema sou uꞌulosinge muaꞌalo la muvikalaneꞌi ta mitema sie Isilaeli lexe ixiu oponeꞌi mo ixiu tumaliau ꞌilixo masumasua noxiꞌa mo sou anu Ioanesi uꞌulosiꞌa.

²⁵No voxo ane Ioanesi sou ukalusou xaixai noxou, la anu mutalisiꞌa ta mitema aloxo ꞌo, ‘Ngingi ngemaisilo la ngexavutala lexe eni ꞌenaꞌei io? Eni itema e ngingi ngaxoxomaiou Anu a eni ꞌo uasi. Ia ngingi ngalomu Anu itema ne iliꞌi xe uneꞌe la eni amomomo sou alulusou lamota sou siovesou tavaꞌu uasi, xo eni amitema vitanisi.’

²⁶Ioxe, ngingi ta vivilo e ngingi Avalaamu ta ꞌiluꞌilusunu, xe ngingi ane ta Iutaia io ngemamaꞌu noxou mo ngetoxonu, ngingi ngalomu, vaikala sou mauli muneꞌe noxinge muisalili.

²⁷Ia ta mitema iloꞌa ta tatila aneꞌi ane mitulu loxo ta kisokisou tuala tila ne Ielusalemu ilavusou Iesu loxo Anu itema sou pamauli uasi. La mivau musoli. Ia aneꞌi miꞌoxonu aloxo ne la mumomomo sou vaikala noxiꞌa ta mitema sou palomatana milemolu tei e aneꞌi iitisou mo ilomusou no voxo Tavuna utotomu.

²⁸Ixalisou susu vile noxou sou ivau usoli no anu uasi, ia aneꞌi xavineꞌi vitanisi sou mivikalanu Pilato lexe uvau Iesu usoli.

²⁹Aneꞌi miꞌoxo aloxo ne noxou sou mimomomo sou mimii ane muai no nano no anu Lavuku Tavuna teinu. Mukalu, la sou aneꞌi milaxanixu teitexi no ovu valautu sou miluꞌe mimulaxu no anu lulu.

³⁰Ia Lataua mutulusou no anu lulu sou soli la mumauli.

³¹Iliꞌi no anu la ta mitema ukalusi e iloꞌa Iesu mimuamuaꞌi no voteꞌi meꞌa ne Xalilaia sou mitelai ne Ielusalemu mimaisou no voxo ta pieana.

³²Ioxe la sou mii e nexi taaꞌalomengi aꞌalo laixe no anu ꞌo ne nexi taaꞌalomengi sou itema e Lataua musakiinu vaikala sou noxiꞌa ta ꞌiluꞌilusunenge tatei lexe upalusou uneꞌe sou ulivulinenge.

³³Aloxo ne, la sou Anu mutulusou Iesu no ꞌa lulu sou soli sou lexe umomomo sou vaikala ane Anu musakinusinge noxiꞌa ta ꞌiluꞌilusunenge tatei. Vaikala sou mii ane ne mikaukavunu muai no nano no anu Lavuku sou Lexe tameisou muvikala aloxo ꞌo, ‘Nini ne nini ꞌalixeni. Vaimomo ꞌo Eni axolu loxo Eni Mamine.’

³⁴Aloxo ne, la sou anu Momu ne mutulusou no anu lulu sou soli, mo uai uꞌui no anu lulu ne uasi. Anu muvikala aloxo ꞌo, ‘Eni emasaxa lexe aalusine no anu aalu iou vilesisi aloxo Eni ealusou mutuxu tuala Deviti. Aalu ane laixe anu uxali manina.’ La sou mii ane Anu mulemolu ne muxali manina loxo Anu musakiinu vaikalasou.

³⁵La sou vaikala vile kalumo muxolu no anu Lavuku sou Lexe muvikala aloxo ꞌo, ‘Nini umomomo sou namalanixu Itema sou xaixai noxine e malemalenga ne uai uꞌui no nano no lulu ne uasi.’

³⁶Ioxe la sou nenge telavusou lexe Deviti ne no mine uao mumauli mo muxoxolu no lia ꞌo, la anu itema sou umulinu masaxa noxou Lataua mo anu uꞌoxo xaixai laixe manina. Ia iliꞌi no mine anu musoli, xe miasixu no anu lulusiꞌa ta ꞌiluꞌilusunu, la vasimolu ne muai muꞌui no nano no lulu ne.

³⁷Io Itema ane ne Lataua mutulusou no anu lulusou soli, la vasimolu uai uꞌui no lulu ne uasi.

³⁸Aloxo ne la sou ta vivilo eni emasaxa lexe ngingi ngalavusou laixe aloxo ꞌo, no anu soli noxou Iesusi la anu muxexeenu susu noxinge aloxo nexi teaꞌalomengixu.

³⁹Io lapuloto noxou Mosesi ne umomomo sou uxexeenu ꞌilixo masumasua noxinge sou ngaxali ngaisalili uasi. Ia Anu itema ane ne si Anu mumomomo sou uxexeenu ꞌilixo masumasua noxiꞌa ta mitema aneꞌi ane imuxamuxaxu taneꞌi noxou, la sou Anu ulemeꞌa lexe ta mitema lailaixe.

⁴⁰La sou ngingi ngaxaxai laixe, xo loxo ꞌo io mii e ta mitema sou palomatana milemolu tatei ne uxali uꞌoxo masuangengi.

⁴¹‘Ngingi ta mitema e ngamolovilaꞌisou Lataua. Xe ngakuluke, mo ngasoli. Xo Eni aꞌoxonu mii vile uxali no nixi noxinge. La sou lexe itema vile uvikalangengi no anu mii ane lexe Eni aꞌoxonu ne, la ngingi ngamuxaxu tangengi no anu uasi.’”

⁴²No mine Paulo muaꞌalo mukalu xe ilou Valunavasi milaa no taasou lalotu noxiꞌa ta Iutaia, la ta mitema mitalisiꞌa ilou sou lexe no Voxo Tavuna ane iliꞌi la, ilou ilivu ineꞌe la sou iaꞌaloiꞌa la no anu vaikala ne.

⁴³Iliꞌi no mine aneꞌi milaa no alalotu, la ta mitema ta Iutaia ta piena xe ta mitema aneꞌi ane ta Iutaia uasi io imulinu lalotu moxiꞌa ta Iutaia sou iloꞌa ta Iutaia milotu mipita no taasou lalotu noxiꞌa ta Iutaia ne mimulineꞌi Paulo ilou Valunavasi. Sou ilou mipeletotosiꞌa sou lexe itulu pekiaꞌa aloxo ne si no anu alauna noxou Lataua.

⁴⁴Xe iliꞌi no anu Voxo Tavuna ane ne, la sexasisisou ta mitema ukalusi no anu tuala tila ane ne mineꞌe mipita sou milomusou vaikala noxou Tila.

⁴⁵Ioxe no mine ta Iutaia mimaisou lexe ta mitema ta piena musuku milomuxu vaikala noxou Tila, la sou aneꞌi oponeꞌi masuau Paulo xe mivikala tumalou noxou xe mivikala masumasua no anu aꞌalo noxou kalumo.

⁴⁶Aloxo ne, la sou Paulo ilou Valunavasi mivikala pekiaꞌu io iꞌume uasi ia ilou mivikalaneꞌi aloxo ꞌo, “Vaikalau Lataua ne tanixu lexe taaꞌaloxu tei a noxinge ne. Ia xo ngingi ngexiunu tumalingeu, la iou loxo ngingi ngexavutala lexe nganoꞌu mauli ane kaluxusou uasisi uasi. La sou ngingi ngalomu. Nexi noxou vaimomo ꞌo taxiu ulai noxiꞌa ta mitema aneꞌi ane ta Iutaia uasi.

⁴⁷Xo Tila mupalusixe la muvikala aloxo ꞌo, ‘Eni apalusine sou nalaixu lamana ane ꞌo noxiꞌa ta mitema aneꞌi ane ta Iutaia uasi. Mo sou ta mitema ukalusi no lialia ꞌo inoꞌu mauli ane kaluxusou uasi.’”

⁴⁸Xe ta mitema aneꞌi ane ta Iutaia uasi ne milomusou vaikala ane ne, la aneꞌi miꞌosa mo miitinu Tila ualasou sou vaikala noxou. La sou ta mitema ta piena e Lataua musosovosiꞌa sou lexe inoꞌu mauli ane kaluxusou uasi ne mixali ta mitema sou imuxamuxaxu taneꞌi.