Aposel 2:3-19

³Irkeb kotaŋ kaŋ naŋkenamiŋ. Irdeb det kura kak melak yara gore yeŋ hitte po kateŋbe bur yeŋ kuŋ al tonaŋ hereŋ keperde tukuriŋ.

⁴Irkeb Holi Spirit beleŋ hard yunkeb almet mere kurayen kurayen yeŋ go ma nurde hitiŋ kuruŋ goyen gwaha mat mere titiŋ ala tiyamiŋ.

⁵Be, Yerusalem gorbe Pentekos nalu kuruŋ goke teŋbe Yuda mar naŋa kurar kurar heŋ Al Kuruŋ doloŋ irde haŋyen mar goyen waŋ gor hinhan.

⁶Be, Yesuyen mere basaŋ mar aposel buda hinhande gor migiriŋ go nurdeb al buda kuruŋ gore yinniŋ yeŋ wayamiŋ. Irdeb aposel budaya Yesu niŋ dufaymiŋ tareŋ irde hinhan marya gore mere kurayen kurayen mat tikeb mel goreb merem mat merem mat nurdeb dinoŋ kok yeŋ tulfut yamiŋ.

⁷Irdeb dufaymiŋ titmiŋ hekeb gaha yamiŋ: “Ey! Mel gab tumŋaŋ Galili mar.

⁸Gega dahade niŋgeb mereniniŋ nende gigen yeke nindikeŋ nurhet?

⁹Irdeb neŋbe naŋa hoyaŋde niŋ hoyaŋde niŋ. Neŋ kurabe Partia naŋare niŋ, kurabe Midia niŋ, munaŋ kurabe Elam naŋare niŋ, kurabe Mesopotemia niŋ, kurabe Yudia niŋ, kurabe Kapadosia niŋ, kurabe Pontus naŋare niŋ. Irde kurabe Esia naŋare niŋ.

¹⁰Goyenbe go po moŋ. Neŋ kurabe Frigia naŋare mat watiŋ. Munaŋ kurabe Pamfilia niŋ, Isip niŋ, irde Libia naŋa bana goŋ niŋ al Sairini taun bindere haŋyen mar. Irde al kurabe Krit motmotde niŋ, kurabe Arebia naŋare niŋ. Irdeb al kurabe Rom mat belŋeŋ wayaŋ. Goyenbe dahade niŋgeb Al Kuruŋ beleŋ mata tiŋeŋ kurayen kurayen al beleŋ gwaha mat forok yeŋ haŋ yeŋ ma nurtek goyen forok yirde hinhin gobe mereniniŋ mat yeŋ haŋ?” yeŋ kukuwamŋeŋ nuramiŋ. (Be, Rom mat wayamiŋ mar goyen kurabe Yuda mar, munaŋ kurabe al miŋ hoyaŋ goyen Yuda marte tikula gama irde haŋyen mar.)

¹²Irdeb hurkuŋkat teŋ gor ŋakŋak teŋbe, “Gab da matabe gago?” yeŋ yiŋgeŋ uliŋ kadom gusuŋaŋ gird tiyamiŋ.

¹³Gega kuramiŋbe Yesu niŋ dufaymiŋ saŋiŋ irde hinhan mar goyen nanosak mere yirdeb, “Mel gabe wain uguŋ po nene kukuwa hahaŋ,” yamiŋ.

¹⁴Irkeb Pitabe aposel buda 11 goya huwardeb kuware al buda goyen gaha yinyiŋ: “Be, kadne yago, deŋ Yuda mar, Yerusalem taunde niŋya siŋare niŋya, ga nurnaŋ. Mata forok yihi gayen miŋ gwahade yeŋ momoŋ direŋ tihim geb, keŋkela kirmiŋtiŋ kernaŋ ko.

¹⁵Gabe 9 kilok wampot Al Kuruŋ mere ird ird nalure hite. Gega deŋ beleŋbe fe nen kukuwa hahaŋ yeŋ denhaŋ?

¹⁶Moŋ, hakot Al Kuruŋyen mere basaŋ al Yoel beleŋ Yuda mar niŋ mere teŋ asaŋde kayyiŋ gobe haŋka gago forok yihi.

¹⁷Al Kuruŋ beleŋbe gaha yiriŋ: ‘Tonne Holi Spiritbe al megen niŋ hitte fe wogortiŋ yara irde yuneŋ. Irkeb kame gab nalu funaŋ forok yiyyeŋ. Irkeb urtiŋya wertiŋ yagoya beleŋ merene basaŋ heŋ tagalnayiŋ. Irde al foŋeŋtiŋ beleŋ yuwarwarte dufayne yeneŋ bebak tinayiŋ. Irde salanŋeŋtiŋ beleŋ mitere dufayne yeneŋ bebak tinayiŋ.

¹⁸Fudinde, nalu goyenterbe meteŋ marne, alya bereya, tumŋaŋ Tonne Holi Spirit yunmeke merene basaŋ heŋ tagalnayiŋ.

¹⁹Irdeb Doyaŋ Al Kuruŋ wayyeŋ nalu kuruŋ goyen forok yeweŋ tikeb megenya naŋkiŋdeyabe mata tiŋeŋ kurayen kurayen al beleŋ yeneŋ tulfut yetek goyen forok yirmeke yennayiŋ. Naŋabe kidoma hiyyeŋ, munaŋ gagasibe buk yeŋ dari yara hiyyeŋ. Munaŋ megeŋbe dari, kakyabe kaki bukdulŋeŋ forok yenayiŋ,’ yitiŋ hi.