Aposel 28:19-30

¹⁹Ba Juda yomba ka i sendingo ana na kanna i Sisa kordagl pirtre ana di dundinambe dinga. Te nana yombanma wagle kot ere tenaglka i ta pirka paikrukwa.

²⁰Mambuno yeglpre na ene kandre te ene bogl ka dinagledi pre agle dinga. Na pirngi dindre sugl moglka ya te Israel yomba ama pirngi dindre sugl meglkwa, taraglmo ipre na sen kane keglkwa.”

²¹Ye di ikine ende Pol tengwa, “Judia kamun yomba ene pre pepa bogl endingo no ta ikunga te angrima wagle ombugl ta undre ene pre ka kinde wakai i ta dingo no pirkunga.

²²Ba ene sragl ka noman suna pangwa i dimin no piramnedi punga, te yomba bange bange mogl-eingwa eremogl epigl kor ta Juda yomba mina plau dungwa i yomba dikinde yei wanmeglkwa i no pirkan ounga.”

²³Yegl dindre Pol kanamnedi pre enge ta di yengwa. Ana ande koragle sungo, Juda yomba merkinde Pol moglmara dumo igle makai singwa. Ana tangina kana Pol mambuno bogl God kingdomo kamo mambuno i dipoglsi ana dipene ende temoglko kamun mim pangwa. Yegl ere Yesus pre Moses lomo ya propet wagle ka muno beglko pangwa ikra; ye pirngi dinaglmedi pre akeningandi dite moglkwa.

²⁴Ye ka ditomara i yomba tau kaima pirngi dingwa ba tau pirngi dikrikwa.

²⁵Yegl ere yene mina nomano suwara yeikrikwa, ba Pol ka suwara yegl ditongo okuwo endingwa, “Ana Holi Spirit ka kaima propet Aisaia mina tongo, ye dimenda ende ene kowano awano tongwa.

²⁶Ye yegl dungwa: “‘Ene pi Juda yomba meglmara ditenatnga, “Ene ka kinano mina piraglkwa ba mambunomo pirpogl sikraglkwa, te ongumutno mina kanaglkwa ba kandime dikraglkwa.

²⁷Sraglpre, yomba i nomano sitorwa erekondungwa, ye kinano si gidungo ka piraglkwa mere manga, te ye ongumutno kiglkwa. Tamanan, ye ongumutno mina kandre, te kinano mina ka i mambuno nomano i-yakete pirpogl sindre, ende ikine na mina wimbi, ana na aglke ye erewakai ere tenaglka!’”

²⁸Pol ama yegl ditongwa, “Ipre ene pirkan eraglmedi na pirka, God erewakai erenoro ere-yungwa kamo i ye ipi Yomba Bina mina tongo ana ye kamo i piraglkwa.”

²⁹Pol ka yegl dikondungo ana Juda yomba yene mina ka tengramo dindre ende perepere eingwa.

³⁰Ana Rom kamun buglayungu suwo Pol yungu ta moni tendre pamara igle yomba prapra ye kanamnedi wingwa i ka wakai di te-te orkwa.