Aposel 28:16-21

¹⁶Ahi asahan bolo kon tinan Rom badeh, iri lau ta atondrok kon Rom leheyani asiu raem i ta Pol le amwenen udu aliy, ma hawe ndramak ari ta bahun udu hawen ta atondrok iy.

¹⁷Pol udu Rom buku len taloh ai, eme ma iy atehei sahou ili tiri tinan tiri Juwis kame ta tukum ari. Iri marakon ndrame ndratukum ndrano, iy eme tiye tiri i buku doh, “Aha nadu tine, jo in hamon ta kandriyen ta tubu taha iri mene. Jo ale bamekes ari lakou ta bolowa iri lau tataha bwe. Arile, iri tawi jo ili bolo asiu lulik udu Jerusalem, ano iri atehei jo ili mine iri Rom.

¹⁸Iri lau tinan badu Rom ndremenya jo, ma anuhun sahou tek, ma iri anya katalou jo ki-iu laleyah, tasah iri basilahei ari ndra-in jo amekes ta adai jo kimek bwe.

¹⁹Arile, iri Juwis banuhun sahou doh bwe. Eme ma jo ari madasan ja bwe. Jo badeh, anya Sisa kanuhun sahou tek. Arile, bala buku jo anya katehei iri lau tek amwenen ta ari lakou a ta mada sahou bwe.

²⁰Ta katin doh le, eme jo aloh aha marakon ame. Jo anya kanyolom aha, ma kasehek sahou hawe aha. Tasah, jo atehei budon tek mara-ei, ma jo atondrok sahou tandrakan nane taha lau marakon badu Isra-el atondrok kede-eh. Ta idoh le, iri bawei jo na sen dah.”

²¹Iri Juwis tiye Pol i buku doh, “Ahi bakohok ramen la-ukei badu Judiya eme tahi ta tiye nyalam eme dah bwe. Ma ari ndramak badu Juwis bame basehek tahi, ma amekes sahou rayah ndra-in ewek tam, bwe.