Aposel 23:15-21

¹⁵Met nemi sur mot tomo nama taro na kiwung, mot in pitar ru tu wasiso torom a labino mugumugu anun a kum tene inaim ma mot in toro pas o Pol gusuni, sur in tulu ru i torom mot. Mot in watungi lena mot nem na longoro tu wasiso talapor melet tano. Ra met, met sa waninar sur met in um doko ru i kut una kisapi ra kabaut i wanpat torom mot.”

¹⁶Ikut a laban o Pol i longoro a wasiso na epak ri, ra i wan utiro una rumu anun a kum tene inaim, ra i inanos o Pol uni.

¹⁷Numur o Pol i kabo pas ara mugumugu anun a kum tene inaim, ma i watungi tano lena, “Un ben a barman ri torom anumot a labino mugumugu, uni i nem na inanosi nam ara wasiso.”

¹⁸Ra i ben pati torom a labino mugumugu, ra i watungi lena, “O Pol, o naro ra di ukarabusi, i kabo pas iau toromi, ra i saring iau sur an ben tar a barman ri torom ui, sur in inanos ui nam ara wasiso.”

¹⁹A labino mugumugu i pam pas a laman a barman, ra i ben eno pasi, ra i tingi lena, “Asau ra u nemi sur un watungi tang?”

²⁰Ra i watungi lena, “A taro Juda det sa epak pas sur det in toro pas o Pol gusun ui, sur un tulu ru i markan torom a taro na kiwung, sur det in longoro tu wasiso talapor melet tano.

²¹Gong u longoro det, uni a wat na noino ma i puku na taro det sa parau taru suri. Uni det sa liliman taru lena, ka det in nangon ma ka det in inum, tuk ut ra det sa um doko ru tar o Pol. Ra uniri det kis langlang sur anum tu nimulaot.”