Aposel 19:5-25

⁵Paul mo babatutu umanawa diadewasamono etane Tatamba Iesu ebowa mampe babatutunton.

⁶Ita Paul witapa mo uwauwo ituno mo osouwo Aleu kakaiwa ieno aia daitada mo atensiawaia mampe gagalonton ita Aleu kakaiwa mo insaisau wanamona rua God aiawa amonantoiena.

⁷Tane sape apana mona uduudu 12 rua Tatamba Iesu ebowe babatutunton.

⁸Uaboa natadea bedewe Paul Iuswa gagalou duwe aleidie mai sa ba mala do badowa gagaloleidie God gonaawa gagalowa leusawasadie mo nuau teinedia mo sumanaintopona.

⁹Tane apana isiwa nuau badoidaleno Gagalo euda mai sumanaiwantope ruawantopona ita apana uduudu emauwo Tatamba intawa Paul waeuwaleidia wakadisasaiena. Sa baiwa Paul mo emone sumanailala banlamone antone apana ebowa Tiranus mampe wimone giruma duwa bedewe walama ruawaleidie waeuwamodie.

¹⁰Me waeuwaleidio ena nata diantoiena ita Iuswa ita Girik apanawa uduudu Asia bolawa bedeuwo waimoia Tatamba aiawa eteiena.

¹¹Paul nolaleidio God ginasa pokawaauida me bedewee dewamon.

¹²Ita apana ginasa pokawaau sa ewane osowe gara kepau ita gara danauwo tautaula Paul ibuwa wiramodia otamone apana kerolala mampo antone etepu osowe teamoieno inanton. Ita deawaa mo apana mida bedeuwo aleu kadiwa waimoia mampo dewantono aleu kadiu emone nomone nambe antoiena.

¹³Walama sawo Iuswa isiwa do aleu kadiu tanamoi antoie. Iuswa pirisiu debama ebowa Sikiwa obampa uduudu 7 mo dewa ema dewasaie. Mo rubusane Tatamba Iesu ebowa mampe aleu kadiu tanamopona baiwantoie. Mo aleu kadiwa apana bedewe wanwanlala diane waiase, “No Iesu dainea Paul umanawa wadia ebowa mampe taneeitana noe aitaa!”

¹⁵Tane walama dea aleu kadiwa mo sipoamone wanase, “Iesu ne ateina, Paul umanawa ne etana, tane e mida, e nolala dainea?”

¹⁶Aleu kadiwa Sikiwa obampa epe diamodio apana sa bedewe aleu kadiwa wanwanlala mo onauida enene badowaida onalene apana sa 7 epaepabobomone mo garau wadapuiamontue etepu maukeialeno osina do etepuida me duwa ene nomone antoiena.

¹⁷Iuswa ita Girik apanawa Epesus bedewe waimoia uduudu ema umanawa etane saidantone Tatamba Iesu wadaposisane ebowa ionosaiena.

¹⁸Tane sumanailala sape waimoia uara ema umanawa etane wimone dewau kadiu apana danauwo sabamo wawiamoiena.

¹⁹Apana wene dewawa daitada dewasaie waimoia mo bukau bedewe wene gagalowa daitada girumamoia otamone wimone apana mampo sabamo sumoiena. Buka sa mo sumoiena malesau wisiantoieno debamaidalen.

²⁰Mo epe dewantoio apana uara Tatamba aiawa mukamukaua ewane atentoiena ita me aiawa apana bedeuwo inilene debamalen.

²¹Dewa ema uduudu segaleno aupe Paul nuawa bedewe insedia me Masedonia ita Akaia bolau bedewainta alepie Ierusalemwa wisepi. Me epe insene meba wane wanase, “Ne Ierusalemwa anteape wainepino walama ambi rua dialepio Rom bedewe anteapa!”

²²Me meba epe insaisalene wane sau sosowa Timoti Erasitus nata waaubamono bauta Masedonia bedewainta antoiena. Tane me Asia bedewe wankasalen, mai tauwadea wauwo alepona, dia.

²³Walama sawo Paul Epesus bedewe nolaleidio Tatamba Iesu waeuwa intawa osowe kadi rebareba debama segalen.

²⁴Apana dea ebowa Demetirius Epesus bedewe wandie. Me ipa silwa iwasalala apanawa. Me silwa mampe mo godiu iwoa ebowa Atemis duwa kakaila aleupa kerakera dewamodie. Me ita me nola sosowa do dewa ema dewasaie mampe mane debamaia donsaie.

²⁵Sa baiwa me nola sosowa ita apana isiwa me nolawa rua dewasaia apamono auweieno diamone wanase, “Sosona, e ateiten no silwa nolawa ema bedewe mane debamaia wadeite wainitana.