Aposolo Jaŋere Binaŋ 19:5-25

⁵Ŋic jaŋe dâŋ i manarâ Wofuŋ Jesu ere ʒâŋeo ʒuhuckehuc Miti Opâ ruambiŋ.

⁶Opâ ruapie Paulozi qizec‐jeŋicko meticne râeme Tiri Mâro jaŋerao wahame miti marac furuo muhuc findaŋdâŋ mumbiŋ.

⁷Ŋic iŋuc embiŋ ʒare‐jeŋic 12 qâririŋ.

⁸Eme Paulo e Judaŋic jaŋere mitificko gâbâ fehuc miti memeŋgaru tâmiric mosa jahec â moc jazahuc juwec, erâ Anuture uucmaŋte jaŋehec mu bâtikic ehuc mu baafec ejarewec.

⁹Eme ŋic gâcne jaŋe maŋsanaŋ erâ Jesure miti râpeckehuc ŋic tutumaŋko musoriŋkepie Paulozi behec‐jopawec. Erâ mitire ejarewec jaŋe qâzuc‐joparâ ʒoaŋne ʒoaŋne ŋic moc ʒâŋene Tirano ere mamana ficko miti jaza qazuc ehuc juwec.

¹⁰Jara jajahec iŋuc ehuc juhame rârec rârec Judaŋic â Grikŋic jurambiŋ jaŋe mâmâc sasawa Wofuŋte dâŋ mana‐fârembiŋ.

¹¹Erâ Anutuzi Paulo neŋgoc ŋesiŋ ŋecnehame mâsi ʒâŋe furu‐jeŋic bocjaha bawec.

¹²Eme irec ŋic jaŋe Paulozi gie qoruc â kereŋ bapa qoruc rojuwec i rorâ huchec jaŋerao barapie bâuarâ ɋiɋic qambiŋ â demoŋ maŋjeŋickonec wisembiŋ.

¹³Ehame Judaŋic riuc bapa gâcne mâreŋ râreckehuc domambiŋ jaŋe penaroŋ erâ Wofuŋ Jesure ʒâŋezi riuc ripa‐jeŋic eocte manasuhuc ŋic demoŋhec ʒiŋuc jazambiŋ: “Jesu ʒâŋe biŋe‐ticne Paulozi muekac ere micte wisezemec.”

¹⁴Taha bapa sâko moc ʒâŋene Sikeua ere ŋokâfâc 7 jaŋe iŋuc hâcne embiŋ.

¹⁵Iŋuc ehuc mupie demoŋzi dâŋ ʒiŋuc bâtikie‐jarewec: “Jesu manakopac â Paulo wâc manakopac, â ŋoŋe ine wenirec?”

¹⁶Iŋuc mume ŋic demoŋheczi momori wânʒâŋ erâ motec sasawa jopa tuŋtuŋ ejarehuc ŋaqi‐jeŋic bâsuc qâsuckeme biuctac â soc rurua fahare fickonec waha wisembiŋ.

¹⁷Eme wiac irec biŋe Efeso haeo Judaŋic â Grikŋic mana‐fârerâ hâbi‐jeŋic goroŋkewec. Ehuc Wofuŋ Jesu muteŋ bâteŋ ecnembiŋ.

¹⁸Eme miti mamana bocjahazi fisirâ qâpucko wiac ejumbieŋ i buafec jaha mufua‐fârembiŋ.

¹⁹Â mârâc qaŋgecte gie bajumbieŋ jaŋe qaŋgec papia amecke‐fârerâ hofao ʒocko rikembiŋ. Eme papia irec furine qâhâckepie siliwa moneŋ 50 tauseŋ qâririŋ ewec.

²⁰Ŋic jaŋe iŋuc epie Wofuŋte dâŋzi ɋiɋicne jaha fua tâcnerâ ŋedâ qâdâmârewec.

²¹Paulo e gie iŋuc baku bafârerâ Makedonia â Akaia mâreŋ fotâc‐jofârâ Jerusalem haeo raocte muwec. Ehuc ʒiŋuc muwec: “No Jerusalem haeo fisirâ mocwâc ware raku Roma haeo fisizepac.”

²²Eme raocte babafic jahecticne Timoteo â Erasto sorec‐jofame Makedonia mâreŋko bânierâ rapic. E jahacne ine Asia mâreŋkoa mocwâc piticne ʒuhuckerâ juwec.

²³Eme dameŋ ira Efeso haeo mitire erâ hâpo ojowa sâko fuawec.

²⁴Siliwazi eri wiac bapa ŋic moc juwec, ʒâŋene Demetrio. Ŋic eki Atemis nemu ufuŋ‐ticnere hawari piic piic siliwazi bame feme ŋic jaŋe furine bapie e â gieŋic âgofâcne moneŋ bocjaha fua‐jare jujec.

²⁵Eme Demetrio e gieŋic âgofâcne hetumaŋ‐joparâ ʒiŋuc jazawec: “Ŋicbureŋ, ŋoŋe gie‐nâŋec izi hâcne moneŋ mafa bâfua‐nâreekac i manaŋgopieŋ.