Aposel 19:3-9

³Aku teko ningi wali Poloni ungu waltindipelie nimbei, “Eno no ambele pupumunga ltingiya?” nimu. “Aya, Jononi imbo no ltindirimu mele aku tepo lino no ltimulu,” ningi.

⁴Kano wali Poloni nimbei, “Jononi imbo no ltindirimumuni imboma konopu topele tokolio no liengei nimu. Nanga umbulkondo orumu iye konopu mondoko ipuki tieio nimu. Aku iyemu yu Jisas,” Pol aku tepa nimu.

⁵I kano ungu pilkolio wali imbo kanoma Iye Awili Jisasinga imbina no ltingi.

⁶Poloni yunge ki kano imbomanga pala noirimu kinye Gotenga Mini Kake Telimu kano imbomanga konopundo orumu. Kano terimu kinye imbo kanomani Gotenga nimbe munduli ungu para tiko imbo ungu lupe lupe oi naa pilelima pulu mondoko ningi.

⁷Iye ki yupoko mele akuna Mini Kake Teli likolio moloringi.

⁸Pol kano Juda imbomanga nombeya ulkena tuku pumbelie Gote iye kamako king molopa imboma pali nokopa tepa limbelo mele ungumu pipili naa kolopa enge nimbe, nimbe tirimu. Juda imboma paa pilko paimbo nengei nimbe oli yupokonga tukundo aku tepa nimu.

⁹Nalo Juda imbo mare enonga oloma kou mele polopa nimu unguma pilko ipuki naa tiringi. Aku Juda imbomani Jisasinga imbomani Gote popo toromele ulu pulumanga ungu keri mare nindiringi. Imunga Pol kano imbo akuma tiye kolopa lombili andoli imboma lipe mepa Tiranusinga ungu ningo skul teringi ulkena purumu. Akuna Pol kano poinye talonga tukundo imboma waliwalimanga ungu nimbe tirimu. Aku tepalie, yunge kongono terimumunga langi mongo merimumu aku Esia kombu tukundo moloringi Juda imbo kape Grik imbo kape palimani Awili Jisasinga temanemu pileringi.