Aposel 14:15-23

¹⁵“A taro, sur asau ra mot pam a kum utna ri? Mir aru musano kut, mir elar kut kai lar mot! Mir wanpat kut nama Wakak na Wasiso torom mot, ma mir inanos mot sur mot in tupukus gusun a kum utna oros kut ri ra mot lotu torom det, sur mot in mur a God ra i laun. I ra, i ukis a bakut, a rakrakon bual, a tasi, ma a kum utna rop ubalandetul.

¹⁶Numugu utmakai, i madek tar a taro tagun a kum gapman rop sur det in laun elar nama nundet a nemnem.

¹⁷Ikut o God ke dumano mot, i ukis tar a kum utna sur mot in tasmani lena, i ut o God. Una nun a marmaris i tabor mot nama bato tagisapat una bakut, ma a kum duwai det wu una kalangin det ut. I tabor mot nama utna na inangon, ma i ubukus mot nama gasgas.”

¹⁸Der watung a wasiso ri, ikut a taro det nemi ut sur det in lotu torom der nama etabor ra di tuni. Ra der dekdek nama iturbat, tuk det mana.

¹⁹Numur a ramano kum te Juda det wanpat tagitong o Antiok ma o Aikoniam, ra det dat pukus pas a nuknukin a susut na taro gusun o Pol der nam o Banabas. Det duku o Pol nama watat, ma det dat pirso ru i gusun a tamon, ra det nuki lena i sa mat.

²⁰Ikut, ra a taro na ususer det tur talilis pasi, i katutur, ra i ruk melet una tamon. Una bung numur, der wan tomo nam o Banabas utong o Derbe.

²¹O Pol ma o Banabas der warawai nama Wakak na Wasiso tong o Derbe, ra der ususer a susut na taro ra det wanpat a kum nat na ususer. Numur der milet melet utong o Listra, Aikoniam, ma o Antiok.

²²Ra der uragot a taro na ususer tagun a tulu tamon ra, ma der wasiso na warut torom det, sur det in tur dekdek una nurnur anundet. Der watungi lena, “A susut na utna in monong mugu tar dat, numur dat in ruk una matanitu anun o God.”

²³Der pilok pas a ramano taro sur det a kum mugumugu anun a taro na lotu, una tulu tamon taktakai. Der wararing ma der wewel, ra der pitar tar det torom a Labino, o naro ra det nurnur uni.