Aposel 13:42-50

⁴²O Pol ma o Banabas der pirso gusun a rumu na lotu, ra a taro det saring der sur der in milet una Bung na Sabat sapat, sur der in wasiso melet torom det una kum utna ri.

⁴³Ra a taro det wan susuaro gusun a rumu na lotu, a susut na te Juda ma det kai a taro gisen ra det ruk una lotu Juda ma det lotu nama lingmulus, det mur o Pol ma o Banabas. Der wasiso torom det, ma der uragot det, sur det in tur dekdek una marmaris anun o God.

⁴⁴Una Bung na Sabat ra det sa kubus tari, milau sur det rop tagun a tamon ra det wanpat tomo, sur det in longoro a wasiso anun o God.

⁴⁵Ra a kum te Juda det tama a kunur na taro, a nuknukin det i laulau torom o Pol ma o Banabas, ma det mang sakosako a kum wasiso ra o Pol i wasiso nami.

⁴⁶Ikut ka der ngara ra der watungi lena, “A labino utna sur mir in upuaso mugu tar a wasiso anun o God torom mot. Ma mir sa pam sot pasi. Ikut mot rosumur gusuni, ra i elar nami ra mot ut mot watungi lena, ‘Ka met tokodos sur met in los a nilaun tukum.’ Mot in tama i, mir in nan mo torom a taro ra awu sur a taro Juda.

⁴⁷Uni a Labino, i tulu mir lena, ‘A ubek tar ui sur ui a talapor anun a taro ra awu sur a taro Juda, sur un los a wasiso torom a taro una rakrakon bual rop lena, an ulaun pas det.’”

⁴⁸A taro ra awu sur a taro Juda det longoro a wasiso ri, ra det gas doko, ma det watung ulabo pas a wasiso anun a Labino. Ma det rop ra di sa pilok pas det sur a nilaun tukum, det nurnur.

⁴⁹Ra a wasiso anun a Labino i wan sarara una kum tamon rop una papor ri.

⁵⁰Ikut a kum te Juda, det ukatutur a nuknukin a kum mugumugu na ino ra det ser urur torom o God, ma a nuknukin a kum mugumugu na musano kai tagun a tamon ra, sur det in ban laulau o Pol ma o Banabas. Ma det lakro ru der gusun anundet a papor.