1Sötiepa nequemejtac nöbe öngeles tli ijijcataya pa inu nöbe esquinas de tlöltecpactle. Quequejquitzquejtaya inu yejyecatl tli yebitz de inu nöbe esquinas para majcamo tlabiteque yejyecatl ipan tlöltecpactle nimpor ipa lamör nimpor impa cuajme.
2Hua nequejtac ocsente öngel que tlejcuya de ca cöne quisa tunale, hua quepeaya tiesieyo de Deus öque nemoa nochepa. Inu öngel oquentzajtzele checöhuac inu nöbe öngeles tli quepeaya checöhualestle para quechibelisque mal noche tlöltecpactle hua lamör.
3Oquejto: ―Ayemo xecchibelicö mal tlöltecpactle nimpor lamör nimpor cuajme hasta senamo tequenseyörusque tietlatequepanojua de toDeus. Tequenseyörusque ipa inmixcuöte.
4Hua onejcac intlapoal de innochtie tli omoseyörojque; oyejyeya ciento cuarenta y cuatro mil de noche tribus noso grupos de giente de Israel tli omoseyörojque.
5De inu tribu de Judá oyejyeya doce mil omoseyörojque, hua de inu tribu de Rubén oyejyeya doce mil, hua de inu tribu de Gad oyejyeya doce mil,
6hua de inu tribu de Aser oyejyeya doce mil, hua de inu tribu de Neftalí oyejyeya doce mil, hua de inu tribu de Manasés oyejyeya doce mil,
7hua de inu tribu de Simeón oyejyeya doce mil, hua de inu tribu de Leví oyejyeya doce mil, hua de inu tribu de Isacar oyejyeya doce mil,
8hua de inu tribu de Zabulón oyejyeya doce mil hua de inu tribu de Josie oyejyeya doce mil hua de inu tribu de Benjamín oyejyeya doce mil tli omoseyörojque.
9Sötiepa nequejtac, hua oyejyeya lalebes meyactie giente, hasta que abele öque quemates intlapoal. Huölajque de noche naciones hua noche tribus hua noche puieblos, hua noche tlajtulte. Ijijcataya ixtla trono hua tieixtla Calnielo. Quepejpeaya intlaquie istöc, hua quepejpeaya ipa inmöhua ixejyo suyotl. Tzajtzajtzeya checöhuac,
10quejejtoöya: Ye tiechenmöquextejque yejuantzetzi toDeus öque yehualuteca ipa trono hua inu Calnielo.
11Hua noche öngeles ijijcataya queyehualojtaya inu trono hua quenyehualojtaya inu biebentzetzi hua inu nöbeme tli yojyulejtecate. Yejua öngeles motlancuöquetzque ca inxöyac hasta tlölpa, hua tieteochijque Deus.
12Oquejtojque: Amén; ma ejqueu iye. Ma tetiemacacö toDeus tlateochihualestle hua chamöhualestle, tlamachestelestle, tlasojcömatelestle, respieto, checöhualestle, hua fuiersa nochepa. Amén; ma ejqueu iye.
13Hua sente de inu biebentzetzi niechontlajtlane: ―¿Öquemeju niecate tli quepejpea intlaquie istöc, hua de cöne huölajque?
14Hua nequelfe: ―NoTlöcatzi, tejuatzi tomomachitea. Hua niechelfe: Yejua cate tli onquisque de inu tiempo cuöc giente quentepotztocaya lalebes. Hua intlaquie quepöjque ca tieyesojtzi Calnielo, hua omocö istöc.
15Por inu seme cate ixtla tietrono de Deus, hua yohualen tunale tejtequejtecate para yejuatzi ipa tieteupa; hua yejuatzi öque yehualuteca ipan trono chöntihuas inca yejua para quenprotejierusque.
16Ayecmo quiema teosebesque nimpor ayecmo quiema ömequesque, ayecmo quiema impa tunas nimpor ayecmo quiema quentlatis totunque,
17ipampa inu Calnielo öque iloac inepantla de inu trono, yejuatzi quenmixutisque hua quenyecönasque ca cöne cate ömieyalte de inu ötzintle tli quetiemaca nemelestle. Hua miero yejuatzi Deus quenmixpojpoasque inmixöyu.
