Aisaiaa 1:1-6

¹Emosira maaqu Aisaiaava qaqi vaiharo taira voqaara tavo uvava maa vukuraqi vairo. ˻Noravano Kotiva nai uva okara Iutaa vaiinti nahentivata, Ieruharemi vaiinti nahentivata, tiva nimireva, tairakaa mintima keharo Aisaiaara tiva ami vaura.˼ Avuhainaa vaiintinavu Usiavave, Jotamuvave, Ahaasivave, Hesekiaavave, vinavuka Iutaaqaa raqiki vau entara Kotiva Aisaiaara tairakaa uva tiva ami vaura.

²Noravano Kotiva mintima tiro: Naaruvavauvo, are aato vateharama ti uva iriane. Vatavauvo, arevata iriane. Te raqikuna vaintika, vika vate noruqamavi, kia ti uva iriraiti, nái antuqaqaa ni variavo.

³Purumakau vika nái qora viraaqamake tave variamanta, donkivata nái qova kara nimi vai tanura kankomake tavaarave. Vika minti variamantavata, ti vaiinti nahenti Isareri vika kia ti kankomake iri tavaraiti, kia ti viraaqaamake tavaavo, tiro. Noravano Kotiva minti tura.

⁴Oho, ne voqamake qora kaiqa vare varia vatanaaka variavaro niqaa nora uvavano vairave. Qora okara auti variaka, ne vika kuvuarama taakama variavo. Ne vaaqu kaiqa voqamake vare variakave. Noravano Kotiva ni Isareri Variqavano takuqu kero vaiva vaimanta ne vira qoririmake tauvaqa utu amitaarave.

⁵Isareritaarito, nantihae ne Kotira uva kia iriraiti, nenta antuqa avatareka auti variavo? Kotiva qaiqaa qaiqaa ni ruqutuarire tie, ne mintiaqi vi variavo? Ne vaireka, qiata teqa taaqama kaa vaiintira voqaara variavaro ni muntukavanovata kia koqemakero vaimanta variarave.

⁶Ne vaireka, numuaravano qiataqihairo ita varero ekaa vaata aiqu kauquvata ita kaivaro kia vo vaatavanovata qaqi vai vaiintira voqaarama variavo. Vo numuara vo numuaravano vira vaataqaa ite vaivaro kia vovanovata vira numuara hiqamakero rumpa amitaraitiro, kia vira numuaraqaa marahinavata aqu amitai vaiintira voqaara, ne qoraiqamavi variarave.