Acts 19:7-32

⁷Taui nelara iavana twelve.

⁸Paul i nae au boru-numana ma kampa nawaravi tonuḡa au orana ana tepatorana mai Jew awarii i bababani. Da rava orai ita sinavirai da Bada ana vigulau ita vitumaḡanei.

⁹Wate ḡelaui kampa orai i bagibagi ma eḡa ita ḡoei da ita vitumaḡana, ma patara au matai Iesu ana etanai i vijiboḡi. Ma Paul taui i voterei ma kerisiana i taravaini ma i nae Tairanus ana au numa, ma kampa i viararamana ma i giugiu pompom.

¹⁰Ma nanare i mae madeḡa ruaḡa i kwa, da mai Jew ma Jentail ravai maḡamaḡaui au Eisia provins maemaei Bada riwana i nonori.

¹¹Ma God ana rewapanei Paul kaua ḡaeḡaei ma aniba i kaukauei,

¹²lamna avena wate rava ai agesi da ai nola garai i naiei Paul awarina da i vodadani ma i naei da rava doridoriai i vodadani, ma arua apoapoei i opu-tawanei ma i lawana.

¹³Mai Jew ḡelaui dobuna i naeni ma arua apoapoei i viviaḡana-opunei ma i raudadana Iesu wavanei da arua apoapoei i viviaḡaḡei. Taui arua apoapoei i riwei i pa, “Iesu wavanei, taunei Paul e raraugugula, Tau a egarim da ma opu.”

¹⁴Skeva, pirisi ai bada natunatuna nelarai seven wei kauana i kaukauei.

¹⁵Wate mara tagogi arua apoapoena i paribelei, “Iesu a aramanei ma Paul a aramanei ma taumi aiavoi?”

¹⁶Ma rava au orana arua apoapoena maemaena i auepai ma taui i vunui da eḡa ita vikalokaloei. Ai gara i sika-naei ma ana kovakovai ma tararatai numei i viopuopuana ma i viruberubei.

¹⁷Mai Jew ma Jentail ravai au Ephesus maemaei wei riwana i nonori ma rovo orai i ḡaeni ma Iesu wavana i vivirana-kauei.

¹⁸Maḡamaḡaui i vitumaḡana ma i nae kerisiana awarii ma ai ḡoʼapoapoe i rupeni.

¹⁹Tauvitumaḡana voui maḡamaḡaui paraparaumai, ai buka i vidamni au deba ma i apui. Maranai bukai ai maia i ʼavi da silver 50,000.

²⁰Kaua babai me wei, Iesu riwana i vibabarai nai au dobuna ma rava maḡamaḡaui i vitumaḡana.

²¹Wei anatapuna au murina Paul au orana i vinua-notanota da au Masedonia da Akaia ita verautuini da ita damana au Jerusalem ma i riwa, “Ana nae au Jerusalem ma muriai ana nae da Rome ana inanai.”

²²Ma Paul ana tauagu ruaḡa Timothy ma Erastus i aiparitawanei au Masedonia provins, ma tauna kampa i mae mara aburuna au Eisia provins.

²³Iesu ana babani ma ana kaua vouna aubaina, ma viḡaiḡaiawa ḡaeḡaena i tupua au Ephesus.

²⁴Silver taunoleina wavana Demetrius, mai Greek ai god wavinena ana numa taparoro kokoitaui i rarau-ḡaroḡaroei da i gimagimarei, ma wei nolana mane ḡaeḡaena e neineiai silver taunoleina nai au dobuna aubaii.

²⁵Ma taui anatapui ai rava nolana tagogina e kaukauei maiteni i rauḡoreiai ma i riwa, “Au rava, o aramanei da ata maura wei nolanei ta vaivaia.

²⁶Ma o inanai ma o nonori menanare wei ravana Paul e kaukauei, Rava ai nota i sinavirai da maḡamaḡaui god Artemis raudunena i voterei au Ephesus ma dobu Eisia paratana anatapuna. Ma e ririwa da ‘rava god i rauḡaroḡaroei, lamna eḡa god.’

²⁷Tauta tana inana kaua da wavata ma ata mane ani kauana eḡa ina apoapoe. Ma ata god ḡetelarana Artemis ana numa taparoro ma wavana eḡa ina vijiboḡi, eḡa au Eisia provins ava ma dobu au anatapuna.”

²⁸Maranai patara wei babanina i nonori taui i meji kaua ma i vigaragarei, “Artemis mai Ephesus ai god i ḡetelera!”

²⁹Ma taui i garagarara rava nai au dobuna i nonori ma taui maiteni i garara labalababa. Anina ma patara Gaius ma Aristakas i vojijini taui ruaḡai mai Masedonia Paul ana tauvigwanigwaniana, ma i rubana-naiei nai dobuna ana boru gabuna.

³⁰Paul i ḡoei da patara au naoi ita rui da ita babani wate kerisiana eḡa ita vianinei.

³¹Wate nanare Paul ana rava ḡelaui au gabemani tauna i viḡaei da eḡa ina nae au boru.

³²Patara i vinuanaina, i logologoi ma i garagarara labalababa ma eḡa ita aramanei aiwai aubaina weka i nei.