Acts 14:5-15

⁵Ikwer-penh Jew-weny-rnem-then Jew-rnem-then Atyetyart ilkwernem-then angkerrenh, Paul-atherr Barnabas-atherr apwertel wetyek.

⁶Ratherrarl angka awek-penh, ratherr aterel-anem anterrek apmer Lycaonia-warl. Lystra tawen-itwek Derbe tawen-itwek-anem intem-antey-anem aney-alpek.

⁷Ratherr ingwer-rnem-anem Jesus-kenh angka mwerr akalty-anthek.

⁸Lystra tawen ikwer-itwek artwa thapel anyent anenh. Alakenh-antey ra ilkwerrek, ingkel alhey-angenh.

⁹Ranem Paul awek rarl ingwer-rnem akalty-antherl-apenh. Artwa renh aremel Paul ra iterl-arek rarl Jesus renh tnakenh, renh irrpelthel mwerriletyek.

¹⁰Paul-el artwa renh ilek, “Ingka atherrel, rtnerl-alha.” Kel ra alpek-anem.

¹¹Ingwer-rnem angkerrenh, altyerr ingwer-rnem irrwerl-they apetyenty-arrpantey ikwer-rnem-warl, Zeus, Hermes-atherr.

¹²Apalel rernem Barnabas renh itnewek Zeus, Paul-arl rernem itnewek Hermes. Rernem ingwer-rnem angkerrenh, Hermes, Zeus-kenh angkakertarl anenh.

¹³Zeus-kenh tyaty ilkwa tawen-they aketh-ampenyel artelhekarl arrer-antey. Atyetyart tyaty-areny ilkelhenh Paul-ek-atherr Barnabas-ek-atherr inkwerelhetyek, tyenkerr-anem renh-atherr anthetyek. Pwelek-rnem-then alperr-rnem-then akngek ikwer-atherr-warl.

¹⁴Paul-atherrel angka awek-penh, ratherr ahelirrek, arnkwa arlpenty-anem ilterrek. Akngerr ampep-warl ratherr arlkemel anterrek,

¹⁵“Artwernemay, aylernanth ahern-areny arrpemarl, arrekantherr-apeny. Aylernanth angka mwerr arrekantherr ilerl-apeyel. Irrtywerrey-angker altyerr ahern nhareny ipmay! Akngey iteth-warl angkepirrenhey-alpenherr-arey! Akngey ikwer-warl, rarl alker-then ahern-then kwaty alay-then arrpmernekarl, thip-rnem-then irrpeng kwaty-areny-rnem-then ingkerrenh-antey. Ingkerrenh anenh apatemel awank-akerr, Akngey iterl-arey-angenh. Aleyan Akngey ilkelheyel, ingkerrenh ikwer-warl angkepirretyek, altyerr irrtywerrey-angker apmwekety ipmelhetyek, renhant anyent iterl-aretyek.