Hechos 14:5-15

⁵Tumetu Iconioju cuanaque tuna cama quisaraticuare, israelita cuana, israelita ama cuanaque jadya. Huaraji cuana tsehue tunaja dutyaja tupu inime jucuare Pablo, Bernabé jadya jidama ijahue ijahue aishu. —Neiyera ecatse tumu tsehue, —jadya tuna jucuare.

⁶Pablo, Bernabé jadya tatse bahue jucuare tunara iyecara ayaque. Bahue juatsu tatse Listra, Derbeju jadya huanacuare. Tumebaedya tatse cuacuare epu cuana japadama. Jeeque beta epu tu Licaonia yahua juque.

⁷Tuhua tatsejatu cuejacuaredya jidaque quisarati Jesús eje buchique.

⁸Tuhua Listrajutu anicuare ecuita ajebaecuaque. Huachi jidamaque cuinanacuare tibutu ajebaecua jucuare.

⁹Jeeque ecuitaratu bacaanicuare Pablora Jesúsja quisarati cuejayaque. Pabloratu pana peta acuare. Petatsutu Pablora inime tupucuare: —Riyaque ecuitara taa ri ejeneya Yusura ajebaecuaque eajeshauque, —jadyatu Pablora inime tupucuare.

¹⁰Tumetu Pablora jadya acuare etsuri jebuda tsehue: —Netitsuracue. Pana neti jucue. Tura jadya ayajutu ecuita putitanacuare. Ajetibunecuare. Etsaca ecatse tujatu jida ajetaqui jucuare.

¹¹Umada ecuitaratu bacuare Pablora ajebaecuaque ajeshahuaju. Baatsu tuna quiquetibunecuare tunaja yana eque, Pabloja yana eque ama: —¡Yusu ecatseri ecuana queja cabameretihua! ¡Cacuitatitsu retse ecuana queja cabameretihua! —jadya tuna jucuare.

¹²—Riyaque ecatse rique ecuanaja yusu ecatse. Tumeque tu Zeus, —jadyatu Bernabé petatsu jucuare. —Tumeque tu ecuanaja yusudya. Riyaque ri Hermes, —jadyatu Pablo petatsu jucuare. Jadya tuna Pablo, Hermes bucha adebacuare, tuque dyaque quisaratihua tibu.

¹³Tuna jadya quiquetereya tsunumeetu pae Pablo, Bernabé ecatse paera jipeticuare. Tuquetu Zeus merequique jucuare. Zeus mui ishuque etarejutu mere jucuare. Tumeque etare cacatu epu ejunacuareju jucuare. Quetimerecuare tujatu toro cuana, tatseja ebacaniju iyemere ishu. Shasha cuanatu paera tatse bajeje ishu quetimerecuare. Paera, ecuita cuanara jadyatu Pablo, Bernabé jadya muicara acuare; tunaja yusu cuana mui ea bucha tunajatu ecatse muicara acuare.

¹⁴Ecuita cuanara Yusu mui ea bucha muicara ayajutu Pablo, Bernabé ecatse dyaque peya inime jucuare. Cachajaticuare tatse tatseja una, peya inime juya jadique cabamereti ishu. Quiqueajecuare tatse tuna queja:

¹⁵—Tata ecana, ¿aishu micuana jadya juya? Yusu ama yatse, ecuitadya jutidya. Micuana buchique cuitadya yatse. Jidaque quisarati micuana cuejara yatse jechine, micuanaja yusu cueya cuana muijaca ishu. Yanacana tuque micuana muiya. Ni aishu buchique tuna jida ama. Tume cuana queja nimee nejujacacue. Yusu Neri queja nimee nejucue. Tuquetu Yusu Chachaque. Turatu barepa iyacuare. Yahuatu iyacuaredya. Cueri cuanaja ecuaquetu iyacuare. Dutya tume cuanaju aniyaque tujatu iyacuare. Jadya eque tu tuque dutya iyaquique.