Acts 10:1-13

¹Caesarea tawen-itwek artwa anyent anenh, itnan Cornelius. Atyetyart ikwerenh irlkenty-rneman akngerrarl anenh ahelengkw 100. Rernem Italy-areny-rnem anenh.

²Cornelius ra artwa iylpareth anenh. Ra Akngeyek awelhenh, ikwerenh-rnem-then. Rernem Akngey-warl angkenh. Anew ikwerenh-then alerikw ikwerenh-rnem-then warrkenh ikwerenh-rnem-then akngerr ingwer-rnem-then, iylpareth-antey awelhenh. Rernem Akngeyek inkwerelhenh, rernem Jew-wenyarl.

³Arlta ingwerel 3 o’clock-apeny Cornelius-el altyerr arek. Ra aketh innga Akngey-kenh angel arek. Akngey-kenh angel arrer irremel Cornelius ikwer yangkelhek.

⁴Cornelius aterirrek, angel renh ayernek, “Ilekek Atyetyart?” Angel ranem renh ilek, “Akngeyel ngenh arek, ngarl ikwer angkenh, ntwarl man-weny-rnem-then ilek-ilek anthenh.

⁵Ntwanem lyert-antey angkakert-rnem thwena Joppa tawen-warl, Simon ikwer-anem yangkelhemel. Simon ra itna ingweran Peter.

⁶Simon Peter aneyel Simon yenp mpwarey-angker-itwek, apmer Joppa-itwek, kwaty impalthelarl warl artelhenh.”

⁷Alakenh angkek-penh angel ra kel alpek-anem. Cornelius warrkenh atherrek yangkelhek, artwa anyent ingwer-then, arnkwa ikwerenh arntarnt-arey-angker.

⁸Cornelius-el angel-kenh angka ikwer-rnem ilek. Ikwer-penhan ra renh-rnem Joppa tawen-warl thwenek.

⁹Arlta ampepel rernem apetyenhel-antey apmer Joppa-warl. Peter nganek warl irrwerl-warl Akngey-warl angketyek.

¹⁰Ra angayakwirrek, amern arlkwetyek iterrek. Ankwel renh atwek, ingwer-rnemel amern ampernenhel-antey. Ra ankwayntek, apelp-anem.

¹¹Ranem altyerr arek. Ra itnywenek, panty ilkwa atnwenth ingwerek-ingwer-akert, thip ingwerek-ingwer-then, ahernel alheyel-rnem-then alker-they atwarrerl-alhenty.

¹³Ra awek, renharl ilek, “Peter-ay, aker atwemel arlkway!”