Acts 10:1-13

¹Ba namai Caesare meyaginai sebare kana waba Cornelius, kona Gentile biyina i mamana, ba kona wai Rome abiabiyisi asi bada, saba kona wai Italy abiabiyisi i binaovisi.

²Kona ba ana rakaraka yabata God si kumakumarei ba si bokuwayei. Ba moyamoyakisi kurisi si bereberena ba mamanina God kurina si rupari.

³Ba rabisi kesana 3:00 nanakasike aba kinakinanai debai mom i kitai, kata God ana aneya i botu kurina, ba i wona, “Cornelius!”

⁴Ba Cornelius ere naganagarina i kita damanei ba i toiruba, “Abi awaika Bada?” Ba aneya i kaobeyei i wona, “Am pari ba am berena moyamoyakisi kurisi, ereonowana puyo rutainina God kurina i gae, ba e nosinosim.

⁵Ba karaku wai pipiya kuni poraisi ku Joppa sebare kana waba Simon Peter sina urabai sina veramaga.

⁶Kona wai Simon aba payapayaya kwapirisi yai sawara e wosewose ba ana yove nisa wai parinai yabata te mamana.”

⁷Ba aneya i sisiya i kakaba wai i nesaira, ba Cornelius ana saibisaibirisi ruwamo i yorisi ba kana aba potapota kesana, kona abiabiyina saba God i bokuwayei.

⁸Ba kosi awaika i tupuwa wai ereonowana i wonisi, ba i poraisi ku Joppa.

⁹Mara i tom rabisi pompom ai matapa si veraverakasibau ku kupurina, ba Peter i gae ku wadakupuna rupari kairavina.

¹⁰Ba soya i rabobo wai ana waina awaika kesana ita kani, saba kam karaku wata kamonai, si bobunagi kamonai kiyakiyaya i kinani.

¹¹Kata sapama i tamotatara ba sawara kesana sowo rutainina i kitai i gaigakira ku dobu.

¹²Ba sowona kamona wai aba payapaya bubausi yai ereonowasi tano ai te botete wai, ba manu kaidamona roborobosi.

¹³Damanina ba gamo i nonori i wona, “Peter, ke bomsiri ki kasibunuwana ba kuna kam.”