Abosolo 2:4-37

⁴Ani biyagola Ngode Datagaliwabe Dinini ibugua tiha to̱lai hene. To̱lai howa wali agali dindi tara taranaga bi lagalaga bilo Dinini ibugua ti mo la hene.

⁵Yu wali agali Ngode Datagaliwabe mitangi biaga hearu dindi bibahendeha howa Yarusaleme íbu ngoai ho hene.

⁶Wali agali urunime u e layuago hale howa bibahende ngoai hene. Ngoai ho hearu hangu hangume hale halu hearia Yasu mana yu tiga biaga hearume bi taratara lagalaga biayuago hale howa ti mogolo hendene.

⁷Tigua mogo lowa lalu, Inanaga bi lalu karu ti bibahende Galili agali hangu ndoyagoda.

⁸Tigua ina hangu hangunaga bi lalu langirane haleho kamago agidabe.

⁹Ina dindi tara tarali íbu kamagoni. Padia howabi Midia howabi Ilama howabi Mesobodemia howabi Yudia howabi Kabadosia howabi Pondasa howabi Esia howabi

¹⁰Piriya howabi Pambilia howabi Iyibi howabi Libia dindi Sairini kaware howabi Lomo ariabi

¹¹Kiridi howabi Arebia howabi Yu wali agalibi wali agali maru ti Yu wali agali mana yu tiga biagarubi ina bibahende kamagohondo tigua inanenaga bi lalu Ngode Datagaliwabehanda biabe timbuni tara biyago langirago, lalu

¹²ti mogo lowa lagalaga bialu lalu, Ogoni agidabe, lene.

¹³Maru hearume mege bialu lalu, Waini iba áyu dege wabu wiago timbuni nayadago lulu yaragoni, lene.

¹⁴Ani layago hale howa Pidabi abosolo maru beriali (11) biarubi ti heba howa ibugua tihondo bi hongo howa lalu, Ina Yu wali agali kamarubi Yarusalemeni kamirubi o biyagoni languliya bayuwa hale halimu.

¹⁵Agali uruni lulu iba nayadago larimibe. Ani ndoyago. Horo áyu wene egerebagi dege kamago.

¹⁶O biragoni bamba Ngode Datagaliwabe mana latagi haga Yoelehanda mbiwia halu lowinidagua lola haragoni. Ngode Datagaliwabehanda layadagua Yoele ibugua lowinigo ogo,

¹⁷Ngode Datagaliwabehanda lalu, Ha maro bulene horo kaware haragola i̱na buleberogo ogo. I̱na i̱naga Dinini wali agali bibahendeha helolebero. Tínaga waneiginime i̱naga bi mana latagi halu holebira. Tínaga igiri daliaherume mbirale tara de gandeba hondolebira. Tínaga agali waherume emaga hondolebira.

¹⁸E̱ aniore buwa horo uruningi i̱naga biabe bia haga wali agalirubi i̱na i̱naga Dinini tiha helolebero. Ani berogola tigua i̱naga bi mana latagi halu holebira.

¹⁹Hari daligaha biabe tara tara nahendene ale hongohe i̱na mo bia halu dindihabi manane tara tara mo walia halu holebero. Anduane Homogonaga Horo timbuni gibi pongo bo winigo naibidaha darama ibunibi ira hungu hagua timbunibi heba hondoleberami. Ni hundialu egebi darama ale dolebirago hondoleberami.

²¹Ani birangi Anduane Homogohondo, Pele ngi, lararume pele mulene yulebira, lalu, Ngode Datagaliwabehanda lene lalu Yoele ibugua bi ogoni lowinigo, Pidahanda lene.

²²Pidahanda lalu, Isaraele wali agaliru-o bi larogo hale halimu. Nasareteali Yasu ibugua agalime nabiagane alebi nahendene alebi taratara binigo Ngode Datagaliwabehanda Yasuha howa ani bini. Ani biyagome Nasareteali Yasu ibu Ngode Datagaliwabehanda loma bia hene howa biabe ogoni bule ibinigo bialu walia hene. Tí hemigoha howa biabe ogoni biyago hondowa tíni manda bidami.

²³Yasu tí kamiruhondo minu ngulebirago Ngode Datagaliwabehanda ala manda manda bu howa ani bilo helene. Anigo Yasu homelo agali ko biaga hearume ibu ira bangani ba para helo tígua mo bia harimi.

²⁴Yasu tongo layagola howa homanaga hongome ibu dariba nahabeheoreyagola Ngode Datagaliwabehanda ibu golope halu mo heya hene.

²⁵Debidihanda Yasu mitangi bialu lenego ogo, I̱na Anduane Homogo ibu i̱naga deni haabo heago i̱ de handaru. Kome i̱ mo ema bia holilono ibu i̱ heba haabo haga ka.

²⁶Ogoninaga i̱ gubaliniha turu holene to̱lai halu i̱na bi turubi laro. Ngode Datagaliwabe í̠na i̱ dinini humbirini andaga naheloleberego. Í̠naga biabe bia haga loma biaho helarigonaga tingini togo nabilo heloleberego. Tingini áyu kogoni howa awe bayaleore holebero lo yu tiga bidogoni.

²⁸Í̠na i̱ haabo holenenaga harigani poliya mo walia harigoni. Í̠na i̱ heba haabo kegome turu holene i̱ha to̱lai holebira, lalu Debidihanda ani laya, lene.

²⁹Pidahanda lalu, I̱ hamene mbaliniru-o inanaga mamali mini lene Kini Debidi mitangi bialu i̱na tíhondo tigatiga laro. Ibu homenegobi hora henegobi ibunaga homali áyu wiaabo kagobi manda bu kama.

³⁰Abale ibu Ngode Datagaliwabe mana latagi haga hearia Ngode Datagaliwabehanda ibuhondo bi heneneore lo wialu lalu, Mahaore í̠naga aguanene mbiralime wali agalinaga kini í̠ kedagua helolebero, lalu lowinigo Debidi ibu manda bu hene.

³¹Ngode Datagaliwabehanda mani ogodagua bulebira mitangi buwa Debidi ibugua bi ogodagua lalu, Ngode Datagaliwabehanda ibu dinini humbirini andaga hela nabi ibu tinginibi homaliha togo nabini, lalu bamba lenego Ngode Datagaliwabehanda Mbirali Dabo Helenego homowa mo heya holebiragonaga mitangi bialu ani lene.

³²Yasu ogoniore Ngode Datagaliwabehanda mo heya hayagola iname handaiore harima.

³³Ngode Datagaliwabe ibugua Yasu mo yaraga halu ibu Abanaga gi tigahayagi berelowa ibuhondo ibunaga Dinini ngulebero lowinidagua mini. Áyu handaramigobi hale haramigobi ibugua inahondo turu halu ngirago inaha hela hayago ogoni.

³⁴Debidi ibuni dahuliya andaga iraga hene ndo ibugua lowialu lalu, Anduane Homogohanda i̱naga Anduane Homogohondo lalu, Í̠naga waitigi karu í̠naga geni malia ho wilo mo malia heloliya í̠ i̱naga gi tigahayagi ogoria birabe, lalu laya, Pidahanda lene.

³⁶Pida ibugua ani lowa lalu, Isaraele wali agali tí bibahende kamiru manda bilimu. Yasu ogoniore tígua ira bangani ba para harimigo Ngode Datagaliwabehanda ibu Anduane Homogo helobi Mbirali Dabo Helenego helobi helayagoni bayuwa manda bilimu, lene.

³⁷Bi ogoni layago hale howa wali agali hearume tinaga gubaliniha nogobaore hayagola dara hene. Dara howa tigua Pidabi abosolo maru biarubi tihondo lalu, Hameneru-o ina agi bulene ngabe, lene.