Abostolo 2:4-37

⁴Vaveve keu Dilava Munanae Tumuike abuemo ui vuvunetievege abu igaegaeai hoto nimoletemo hoto loui lotilu.

⁵Vani kemo Dilava hoesehavomale Diue ata moagaeau Dielusalemae ua. Keau Dielusalema ata holioholisito vata bahatamo lohoale eboulahai Dilava hoesehavoma.

⁶Iale keau luluale ke evisi bibuluvisi o keve lohoaleau o kela velehovoi vikolahalu. Kosealemo keau evige Iesu esemuiau hotoeabe igaegaemo hoto loui lotilu.

⁷Abu ke evisi vikolahai loui avoe, “Nahi hilokage malaha keau Galili ataeabulike. Keau nahie hoto hilokaholilu.

⁸Iale oleve kateike abu vai nahie hoto selevemo hoto louma.

⁹Nahiau o igaegaeai matama nimolete kebiamo loholu. Batia, Media, Elama, Mesobotamia, Diudia, Kabadosia, Botasi, Esia vata kebiamo loholu.

¹⁰Isi Vilisia, Babilia, Egubito, Keliti, Alebia, Libia (Keu Sailini vavae) vata kebiamo loholu. Isege nahi benahateau Loma o baluga kemo loholu. Nahi degomoleau Diue ata seleve. Isege nahi degomoleau Diue ata holioholisito Diue vaveve ke vama.

¹¹Nahiau vata nimolete kebiamo loholu. Isito nahi malaha kebia hoto evige keau nahie hoto selevemo Dilava vaveve nimolete louma.”

¹²Kateai tetelahai mole namigevei avoe, “Osialemoike abu vaveve kateale vama.”

¹³Isi kateige degomoleau helahai loui avoe, “Ba, keau e toela ilike vaime katelahalu.”

¹⁴Abu kateai louge Bitau abostolo degomolehi hoto ke evilu. Ige Bitau hovelahai baita namigevei avoe, “Diue ata bahataeau Dielusalemamo uale evive. Di isiviale vaveve ko deiada loui la namigevei.

¹⁵La huhuige no e toela ilu. Isito keu hoto seleve holioholinu. Elehave. Vau aike alamonu. Iale la huhuige atabena valive vavita vavita e toela isi. Ba.

¹⁶Isito beloveta Dioelau subuta mole hisaliale keike esemu koeau aike vama.

¹⁷Dioelau hisaliale hoto keu koseanu. ‘Dilavau avoe, Dana vanie gabila di Munanae Tumu hanavoge auna dobai lohoi la bahata vuvunetievege la eseabuna ono vadeu gabie lohoveve ke loui ata namigevei. Isege la atae doga keabuna lahoahoai. Isege la malahae kosive keabuna tababu nimolete elegevei.

¹⁸Ige Munana Tumutena dobai lohoi di esemu bahata negotievege malaha keate bahataeabuna ono vadeu gabie lohoveve hoto ke loui ata namigevei.

¹⁹Ige dana vaveve nimolete otogomo hanavege vanina loasege batana tahoai. Isege heie vata kove taho, vene isi dio balugana ui. Keau kateisege iave keve Kosive vani balugana bae lohoi.

²¹Vaveve katealeu velemage oleuoleu Kosive ivimo Dilava imihage auna kebia malevei.’

²²Iselala ataea, di hoto evive. Iesu keu Nasaleta omo lohoge Dilavau tedahoge au vuvunevemo vaveve nimolete vai vikoe vaveve nimoleta vaevenu. Iale au vadeu vale ke la elehai hilokalu.

²³Isito la isiviale hamage au hatisi. Isi kateai mai atae toela ovege abu mai idie domo hamage au hatinu. Isito subuta mole Dilavau au lulelemo la vaveve ke hilokai loui avoe, Abuna katelahai. Ialeike la ke valu.

²⁴Iesuu vatehani mai hatiale kemo Dilavau etuvage au hovelahanu. Kosealemo hatihati ke vuvuneu mage au gulimo uveve keu anekianu.

²⁵Deividiu subuta Samusi bukamo Iesu vaveve koseale hisalianu. Avoe, ‘Di hilokage Kosiveu vani bahata daiti uma. Keu di vavamo umalemo vaveve isutena daemo lohoge di bae kemo dobalivebene.

²⁶Ialemo di uvuu vahaeho balugage di Dilava hoesehavoveve hoto louma. Di hilokage dana hatige auna tota di etuvai.

²⁷Iale di hatige au bae di munana halege au bae odavae ulivebene. Isi au bae au esemu tumute ke halege au bae gulimo ui sakavalivebene.

²⁸Au ukolikolie humaha di haivui vani bahata daiti uge di kemo vahaeho baluganu.’

²⁹Di haokuvuia, di isiviale nahie buluve Deividi ke deiada louge avuemo lulelelahave. Keu subuta mole hatige abu mai abavulu. Iale vutave keu nova avulike ua.

³⁰Deividi keu Dilava beloveta holisi hilokage Dilavana au ono vade louale ke vai. Au Deividi namihai avoe, ‘Dana aemo a valada mole mage auna kosive holisi telonamo ugulamoi.’

³¹Ige Deividiu ke evisi Dilavau gabie vaveve hilokai Kelisou hovelahaveve kemo loui avoe, ‘Au hatige Dilavau bae munanave halege au bae odavae ulivebene. Isi gulimo halege au bae ui sakavalivebene.’

³²Hoto kateale loualemo Dilavau etuvage hovelahage no ke elehalu.

³³Dilavau Iesu ebagamai au ada inuteve mamoi au louale ke nahate au Munana Tumute omige au Munanae Tumu noevege no vuvunevemo hoto ke louge la evilu.

³⁴Deividiu Iesuu vale ke nahate vai ehue tioholinu. Isito keu subuta loui avoe, ‘Dilavau di Kosiveho loui avoe, Di ada inuteve ugulamonela.

³⁵Isege di a aiohavomale kebia malevei a veloe heimo otovege Kosiveabe holinela.’

³⁶Iselala ata bahataea, hoto ko evive. La Iesu mai idie domo hamale keike Dilavau etuvage hovelahai Kosive holisi a tedaeveve ata Keliso holinu.”

³⁷Bitau hoto kateale louge abu ke evisi huhube nimole valu. Isi kateai Bitata abostolo degomoleta namigevei avoe, “No haokuvuia, noeabuna vadeu vai.”