A Kakailai I Lia 2:1-15

¹Iau a lelegurua maro Saron, Ma ra vaigoara ta ra malamale.

²Da ra vaigoara livuan ta ra umana kait, I damana kaugu vakak livuan ta diat ra vaden.

³Da ra gamata livuan ta ra lavur davai na pui, I damana kaugu vakak livuan pire ra tarai. Iau ga ki ma ra gugu ta ra maluruna, Ma ra vuaina i kalami piragu.

⁴I ga ben tar iau ta ra pal na nian, Ma kana vakilang nina i bebe taun iau, ia ra varmari.

⁵Avat a vadekdek iau ma ra vuai na vain di vuare, ma avat a vamaram iau ma ra gamata, Tago iau mait ma ra varmari.

⁶Boina ba ra limana, a maira, na va ta ra kabinamur na ulugu, Ma ra limana tuna na tal iau me.

⁷Ea, a umana vavina Ierusalem, iau vargat avat Tai ra umana vakak na leing ma ra umana me, Ba koko avat a vararak pa ra mamainga upi ra varmari Tuk tar ba i arikai.

⁸Ra nilai kaugu vakak! Gire i vut, I pil ta ra lualuana, i pipil tur vanavana ta ra buabuana.

⁹Kaugu vakak i da ra vakak na leing, ba ra nat na me; Gire, i tur ta ra papar a pal, I gigira ruk ta ra umana mata na kalangar, Di gire ta ra liplip na ubene.

¹⁰Kaugu vakak i ga tata, ma i ga biti tagu; Una tut, kaugu vakak, kaugu valilingina, ma dor a vana;

¹¹Tago ra e na madoldol i tar par, I tar par ra bata;

¹²Di gire ra umana pupu na davai ta ra gunagunan, Ra e kai ra umana beo nina dia kakailai i vut, Ma di valongore ra nilai ra uka ta kada gunan;

¹³Ra vuai na lovo i matuka vanavana, Ma ra umana vain dia pupu, Ma dia ang na vuai. Una tut, kaugu vakak, kaugu valilingina, ma dor a vana.

¹⁴Ea, kaugu uka ta ra umana ngovo na vat, ta ra bakbakit ta ra ar na vat, Boina ba ina gire ra pal a matam, boina ba ina valongore ra nilaim, Tago ra nilaim i kalami, ma ra pal a matam i vakak.

¹⁵Avat a kinim vake ra umana leing na pap, ra umana nat na leing na pap, nina dia kokore ra uma na vain; Tago kaveve umana vain dia pupu.