3 ዮሃኒሳ 1

1

¹ታፔ ጪማዛፔ ቱማፔ ታ ሲቂዛ ታ ሲቆ ላጌ ጋዪዮሳስ።

²ታ ኢሻዞ! ኔ ሼምፖይ ሎዖን ዲዛ ማላ ኔ ኣሳቴꬃይ ሎዖ ዳና ማላኔ ኔ ኦꬂዛዚ ዉሪካ ኔስ ጊጋ ጊዳና ማላ ታ ኔስ ዎሳይስ።

³ኔ ቱማስ ኣማኔቲዳዴ ጊዲዳ ማላ ቃሴካ ኔ ሃኖይ ዉሪ ቱሙ ጊዲዳይሳ ኢሲ ኢሲ ኣማኒዛ ኣሳቲ ታኮ ዪዲ ኔ ጊሽ ዮቲን ሲያዳ ታ ዳሮ ኡፋዬታዲስ።

⁴ጋሶይካ ታ ናይቲ ሎዖኔ ቱማን ሲሜሬቲሺን ሲሳፌ ኣꬊዛ ሃራ ኡፋይሲ ታስ ዴና።

⁵ታ ኢሻዞ! ኢስቲ ኔስ ኢማꬅ ጊዲኮካ ኔኒ ኔ ኢሻታስ ኦꬂዳ ሚሼ ኡባን ኣማኔታዳሳ።

⁶ኔ ቦላ ኣይ ማላ ሲቆይ ዲዛኮኔ ኢስቲ ኔ ጊሽ ዎሳ ኬꬃ ኣሳ ሲንꬃን ማርካቲዳ። ኢስቲ ቢዛ ኦጌን ፆሴ ኡፋይሲዛ ሃኖን ኔ ኢስታ ማዲኮ ሎዖ ኦꬃሳ።

⁷ኣይሲ ጊኮ ኢስቲ ፆሳ ኣማኖንታይታፔ ኣይኮካ ኤኮንታ ኪርስቶሳ ሱንꬃ ጊሽ ሜላ ኬዚዳ።

⁸ሄሳ ጊሽ ኑ ኢሲፌ ቱማስ ኦꬃና ማላ ሄይታንታ ማላታ ሞኪ ኤካናስ ቤሴስ።

⁹ታ ዎሳ ኬꬃስ ሃይሳፌ ካሴ ፃፋዲስ። ጊዶ ኣቲን ካሌꬂዛዴ ጊዳና ኮዪዛ ዲዮፂራፆሲ ኑ ጊዛዝ ኤኬና።

¹⁰ሄሳ ጊሽ፥ ታ ሄ ቢኮ ኢዚ ባ ኢታ ቃላን ኑ ሱንꬅ ሞራናስ ኦꬂዳይሳ ታ ኢንቴስ ቆንጪሳና። ሄሲካ ኢዛስ ጊዶንታ ኢፂን ኣማኒዛ ኣሳ ሞኪ ኤኬና፤ ሞኪ ኤካና ኮዪዛይታካ ዲጌሲኔ ዎሳ ኬꬃፌ ኬሲ ጎዴስ።

¹¹ታ ኢሻዞ! ሎዖታ ሚሳታ ኣቲን ኢታ ኣሳታ ሚሳቶፓ። ሎዖ ኦꬂዛዴይ ዉሪካ ፆሳ ኣሳ። ኢታ ኦꬂዛዴይ ቃሴ ፆሴ ቤይቤና።

¹²ዲሜፂሮሳስ ኣሲ ዉሪ ሎዖ ማርካቴስ። ቱማይካ ኢዛስ ማርካታዉስ። ኑካ ኢዛስ ማርካቶስ፤ ኢንቴካ ኑ ማርካይ ቱሙ ጊዲዳይሳ ኤሬታ።

¹³ታ ኔስ ፃፋና ቡሮ ዳሮ ዮዖይ ዴስ ሺን ታ ኔስ ዋራቃታን ፃፋናስ ኮዪኬ።

¹⁴ታ ኔና ማታ ዎዴ ቤያናስ ሂዶታ ኦꬃይስ፤ ሄ ዎዴ ኑ ኢሲፌ ኡቲ ሃሳያና።

¹⁵ኣኔ ሳሮን ዳ፤ ኔ ላጌቲ ኔና ሳሮ ሳሮ ጌቴስ፤ ታ ላጌታ ሱንꬃን ሱንꬃን ፄይጋዳ ሳሮ ጋ።