1Ngode Datagaliwabehanda Yudasa Magabeusu halu ibu damene hearu biamogo biyagola ibugua waitigi giha howa Anduane Homogonaga andabi Yarusaleme tanobi mo yu dai bini.
2Tigua lomabu delaga dabu agali tara íbu hayarume wali agali ngoai ho haga hama wiagoria bu helayago bo gialo wahai halu mbirale dama mitangi bialu bi pupu wiaga gime wabini wiarunaga anda bu helearubi bo gialo wahai halu bini.
3Tigua Anduane Homogonaga anda lone Anduane Homogo deni dodo nahe helo mo loma bia halu biagane mana wiaru bialu anda timbuni biago mo loma bia halu tigua lomabu delaga dabu mbira gahenge bu helalu bini. Tigua ege to̱le̱ kira ira delolenedagoria bo gingido helalu loma gahenge bo delene. Mali kirani tigua Anduane Homogonaga andaha loma bo delabe naheore hene. Ani bialu ira hagua nga bilo delaga mini inisenesiru lomabu delalu lamu hale wiaru hedo delalu mberedi Anduane Homogonaga deni ngelaga biaru lone mo wialu bini.
4Ani biai howa mani mbirale mo ko holene ibiyaruale lone naibilelo tigua dindini paliape hai howa Ngode Datagaliwabehondo bi lene. Tigua Ngode Datagaliwabehondo lalu, Ina ko lone birimayagua nde ina minalu wali agali tara Anduane Homogo mitangi nahaga karuhondo minu mialu wali agali mege biaga karu giha minu ya habe, lene.
5Tigua ege mini Kisilebenaga horo pira kirani duria (25) layagola Anduane Homogonaga anda ogoni lone mo loma bia hene. Ala egebi horobi ogoningi dege agali tara tagiraha howa ibiyarume anda ogoni Anduane Homogo deni mo dodohe helene wini.
6Ai horo halirani Yuda wali agali tigua turu ho howa tomo dewaore dawa nalu Horo Timbuni Anda Nemandaruha Palu Holene Horo biagobi ogoningi dege halu bini. Ani bialu tigua horo uruni mali abale hayarunaga holene winigo mitangi bu dai bini. Mali uruninaga ti togolo yu ibida pialu dindi ko wali agali nahaga wiaruhabi egeanda hearuhabi biango gabuaru paliradagua palima ibaga bialu hene.
7Ani bialu henego ayu tigua ira magane gahengeru bu yalu ayage yuniru bu yalu halimbu wiaru ira yunime mo yári bia halu bini. Ani buwa tigua Ngode Datagaliwabehanda ibunaga anda ogoni lone mo loma bia helonaga henge ogoni mo wia hayagonaga tigua ibunaga mini yaraga howa turu halu iba gana lalu hene.
8Ani bialu tigua mana gahenge mbira wabinigo mana ogoni ogodagua leda, Mali bibahendengi horo ayu kemago tagira ibiragola Yuda wali agalime Anduane Homogonaga anda lone mo loma bia haramago manda biaabo holene nga, lene.
9Ainde Andiogusu Epibanesenaga te abale larimago hale harimi. Ai ayu iname agali mende Andiogusu ko biago igini Andiogusu Yubadonaga te laramago hale hadaba.
10Ayu iname te emene tigimandi dege lone ko tagira ibini ngarunagabi ibugua wai binirunaga tebi loleberema.
11Ainde Andiogusu Yubado ibu kini ha aribia ho howa ibugua agali mbira mini Lisiasa heago ibu dindi kira Koelesiriala la Ponisialanaga gabumane agali haguane helo dabo helene.
12Ani helowa ibugua agali bayale mini Tolemi Magarono ibu gabumane agali haguane howa ibugua Yuda wali agalihondo mana bayale biaabo halu ibugua gabumane mana bayale hendore bulene ngadagua bialu haga hene.
13Ani biaga hearia agali Kininaga Nenege laga agali maru hearume Yubado hearia puwa Magaronohanda ko biya lalu ndelene. Ainde bamba Kini Pilomedohanda dindi mbira iba solowara dombeneha mini Saibarasa wiago ibugua handaya ho helo miyagola agali bu hearu bibahendeme agali ogoni kininaga waitigi ka laga hene. Anigo ibugua dindi ogoni wahalu puwa Andiogusu Epibanesela nenege ho haga hene. Ani bialu howa ibunaga mini abale gabumane biabe biaga bayale mbira ka lene haga wiago lone mo yu dai bibe naheyagola ai nde homagane tomia mbira ibunime nalu homene.
14Ai Gogiasa ibu dindi ogoniha gabumane haguane hene. Ani howa ibugua dindi tara tara wiaruha ami agali hearu munime yolo bialu haru ibuwa Yuda baba wai biaabo halu haga hene.
15Ani bialu heagola Idumea hearu tiguabi nde dindi bayaleha wai pabeanda hongohe heagoha wai bulene hamabi bayale wiagoha howa tigua Yuda baba wai bule karali bialu hene. Idumea tigua wali agali ko bialu Yarusalemeha howa ibida pene hearu mo doho howa tigua wai bulenenaga mana lehe bialu haga hene.
16Ainde Yudasa Magabeusu halu ibu aria hearume Ngode Datagaliwabehondo tigua wai buluma̱ya biamogo bibe lowa bi lalu hene. Ani lalu puwa tigua Idumea dindiha tano hongohe wai pabeanda haga wiaru karulole wai bule pene.
17Puwa tigua wai hongo howaore bialu wai pabeanda uruni bo poda anda halu karulai hene. Tigua agali wai pabe neneni howa wai biadali halu biyaru baba hongo howa bialu bo taliatogo lai halu tigua waitigi daosini dege pira kira (20,000) horo ogoningi bai hene.
18Ai waitigi ami agali daosini dira (9,000) agima ibida pialu mamageali hagane anda hongohe bima irigi hene kira heagoha ha do hai hene. Anda mamageali hagane ogoniale kagoha wai biaganeale mbirale damene mo wiaga hene.
19Ainde Magabeusu ibugua Saimonobi Yosebebi Sagiusu heba wai bialu helalu ibugua wai hongoheore gime minaminaga bialu heago biamogo bule pene.
20Ani biyagola Saimononaga ami agali maru hearume ti muni hame lowa agali anda hongohe biagoha waitigi birayarume siliba muni genda magi pira waragariani maria (64) tinaga giha mo ya hene. Tigua ogonidagua bialu munime de miniru minai ho berelalu tini ibida pora bialu piai hene.
21Mbirale uruni biya layago Yudasa ibu hale howa ibugua ami haru hagane agali haguane hearu ibidaba lowa godi hale hene. Hale halu howa lalu, Ami agali waitigime muni miyago mo yalu hayadaru tigua ti hamene bu karu muni taguiyada. Ai tigua waitigi ibida pelo yupe hayadagome dai bialu ina aria bu karu bo wahai holobada, lene.
22Yudasa ibugua anidagua lalu ami agali muni mo yaga biaru homelo bo wahai hene. Ani bialu gerai lalu wai dai buwa pabeanda hongohe kira anda pene.
23Wai Yudasa ibu heba bialu kagoha tigua waitigi bo podahana haga hene. Ani howa ai ibugua wai pabeanda anda hongohe kira ogoniha giala anda halu wai biyadagoha waitigi daosini dege pira kira (20,000) bolangua howa bai hene.
24Abale nde Yuda tigua Timodi bope haya handala penego ainde Timodi ibugua puwa ami agali dewaore yolo buwaore yolo bu helowa ibugua ami agali maru Esiaha hearu baba mo mogo bialu dewaore agali Esia ami uruni nogo hosini biruwa wai biaga henego uruni heba mo mogo bini. Ani bialu puwa tigua wai hongo howa bialu Yudia karulai hole tidiyu pene.
25Ani bialu ti wene harigani pialu hearia Yudasa Magabeusu halu ibunaga ami agali hearume Anduane Homogohondo bi lalu hene. Tigua bi lalu howa dara howa aga karulaya wiaru karulalu be abalu ti haguaneni dugu wua hene.
26Ani bialu tigua lomabu delaga dabu heago kawareni dindi wiagoria bu palu wuwa tigua Ngode Datagaliwabehanda wai bulebirago biamogo bilonaga ibuhondo bi lalu hene. Tigua Ngode Datagaliwabehondo tinaga waitigi kagoha pialu waitigi uruni bo hilo wahai habe lalu lamini. Tigua ani lalu henedagoni bamba Anduane Homogo ibunime ibunaga bi mana lo wini ngagoha howa lo wialu ibunaga wali agali baya hangu handaya ho holebero lo winigo manda bialu lene.
27Tigua Anduane Homogohondo bi lai halu tinaga wai biaganeale wiaru mo yai halu Yarusaleme howa tagira pialu kaundiaha pole pene. Puwa waitigi heagoria kaware dege handaya howa manda manda bu hene.
28Ani howa ni tagira ibule manda biyangi mendeha mendaha howabi wai pora bigi bigi bini. Ani bialu howa Yuda ami ti tininaga hongo hanguni hana howa ndo wai bialu kema tigua Anduane Homogonaga hongoni howa wai bialu kemagome tigua wai bialu bo poda hana halu bope holeda lo manda buwa wai bialu hene. Waitigime tinaga keba holene hongoni howa wayali holeberema lo manda buwa wai bialu hene.
29Wai hongo howaore kaware hapara howa gime minigi minigi bialu howa waitigi agali biarume de handadaga howa handalu hemiria agali bayaleore duriali nogo hosini biralu nogo mo tiga biagane pu ngolome wabiniyago ogonime nogo hosi mo tiga bima ibiyago de hendene. Agali durialu uruni tigua Yuda ami agali haru halu bamba hayaria de hendene.
30Ani piyagola agali duria uruni ti Magabeusu heba mandagi howa tigua ibu ho hagira bialu tigua wai pole karulaga aga karulearume Magabeusu timu nabelonaga ge hai helearia de hendene. Ani buwa tigua danda timu tege lalu bayagome dabale harini kulukala lalu waitiginaga de minai haga bini. Anidagua biyagome waitigi mo luluya hayagola wai wahalu tini headagua ibida pugu pugu bai hene. Ani pugu pugu biyagola Yuda tigua waitigi minalu bai hene.
31Yuda ami tigua waitigi ami agali geni pialu wai biagane daosini dege pira kirani handari duria (20,500) homelo bo wahai halu handari waragaria (600) nogo hosini biruwa wai biaga heneru homelo bo wahai halu bini.
32Ani biya handala Timodi ibuni ibida pialu Gese tanoha wai pabeanda hongohe wiagoha Kaireasahanda ami agali hongohe haru haga wiagoha anda pialu birado hene.
33Ani piyagola Magabeusu halu ibunaga ami agali biarume horo maru Gese tano wai pabeanda hongohe ogoniha wai bialu hole turuore howa bialu hene.
34Ami agali wai pabe hongohe ogoniha hearume tinaga wai pabeanda hongohe ogoni bo gialalu podama anda naibulubada lo manda buwa ti ogoriani hongo hanaho howa tigua Yuda ami agali biaru hondobi Anduane Homogohondobi mege timbuni bialu bi koru latagi halu hene.
35Ani lalu heagola horo dauningi egerebahagi ni tagira ibiyagola Yudali Magabeusunaga ami agali igiri daliaheru pira kira (20) hearumeore keba timbuni hene. Tigua homolene gi naheore elahe howa wai pabe hongohe ege pabe heago irigi hene. Ani pialu porabu anda howa gerai mo koheore pialu agali ti deni ngola hayago damene bibahende ayu tibume dibu gaibu paya biai hene.
36Waitigime agali uruni baba hila mialu wai bialu heagola Yuda ami halu mende anda puwa wai pabe anda hongohe heago ami agali mamage haga hearu baba wai bialu hene. Ani bialu tigua agali mamage haganaga anda ege pabe neneni bima irigi hene hearu bo heda hai halu ira gialo wahayaru mo mogo buwa ira timbuni bo delowa agali waitigiali mege biaga biaru minalu ira ogoniha do taulaha helene. Ani bialu Yuda ami tidi tebone lone tanoha anda puwa maru tagira hearu anda ibilonaga wai pabe hongohe heagonaga panga hongohe payatagi hearu bibahende bo gialai halu panga dugupe hai hene. Ani bialu tano Yuda ami agali biaru ti anda pialu karulai hene.
37Ainde Timodi ibuni ibida pialu iba hambiaga iba uli tombo wiagoha birado hearia tigua handa walia halu minuwa homelo bo wahene. Ani bialu tigua Timodi hamene Kaireasa heago homelo ayu tibume dibu wahalu agali mende mini Abolobanese heagobi homelo bo wahalu bini.
38Wai biai howa Yuda ami agali tigua Anduane Homogonaga mini yaraga hene. Anduane Homogohanda ibunaga dara holene wiago Isaraele wali agali mo walia halu tigua waitigi bope helo hongo miyagonaga tigua turu timbuni halu ka̱i̱ lowa iba gana lalu Anduane Homogonaga mini yaraga halu hene.
