1Manta Matjatuniyalawana Yiitjuku walytja tjuṯa ngurra tjuṯawana tjungurringkupayi Yiitjunya waḻkuntjaku. Katutjalu aḻṯururringkula tjananya yaṉṯayaṉṯantjala paluru tjana tjukarurru nyinanyi Katutjaku. Yalatji kuliranyurra yunypa nyinanytjaku.
2Paluru tjana Matjatuniyanya ngurrara tjuṯa maralpa nguwanpa nyinanyi, wiya tjana mani tiṉa mantjilpayi. Kutjupa tjuṯangku tjananya panypurangkula pungkunytjala tjana kutu Yiitjuku tjukarurru nyinapayi. Yalatji nyinarra tjana yunypangku mani tiṉa tjunkula kanyilpayi, Tjuutiyanya ngurrara tjuṯaku, maralpa tjuṯaku.
3Paluru tjana nganaṉanyatju yalatji watjalpayi, “Nganaṉa yunytjurringanyi mani tjanampa tjunkula kanyintjaku.” Yiltaya paluru tjana walytjangku kulira mani tiṉa tjunkula kanyilpayi, ngayulu tjananya wiya watjaṉu. Tjaampalangkuya mani tiṉa tjunkula wiya mani kutjupa tjana kanyiṉu mangarriku.
5Paluru tjana yurrunpa watjaṉu, “Nganaṉa yunytjurringanyi Yiitjuku tjukarurru kutu nyinanytjaku.” Yalatji tjukarurru nyinarra tjana mani tiṉa panyapa tjunkula kanyiṉu. Nganampa wangkawanaṯarra tjana kulira nyinapayi. Yalatji tjana palya nyinanytjala Katutjalu kuliṉi. Paluru tjana yalatji tjukarurru nyinarra mani tiṉa tjunkula kanyintjala nganaṉatju puntura yunyparringu.
6Yalatji Matjatuniyanya ngurrara tjuṯangkuya mani tjunkula kanyiṉutjangka, kuliralatju watjaṉu, Tayitutjanya nyurrangarrilakutu, Kurinytjiyanya ngurrara tjuṯakutulpi yankunytjaku. Tjungungkunyurra Tayitutjalu yirriṯi tjananya watjalpayi mani tjunkula kanyintjaku, Tjuutiyanya ngurrara tjuṯaku. Paluru piyuku nyurrangarrilakutu yankula piyuku tjungungkunyurra watjantjaku tjananya, mani panyapa tjuṯaku tjunkula kanyintjaku. Tjuutiyanya ngurrara panyapa tjuṯaku yunytjurringkulanyurra mani tjanampa tjunkunytjaku.
7Kurinytjiyanya ngurrara tjuṯanyurra Yiitjuku walytja palyalingku nyinanyi. Yiltanyurra Yiitju Kurayitjaku tjukarurru nyinanyi. Yiitjuku wangkanyurra palya kulira tjukarurru tjakultjunkupayi. Nganampatju nyurrangarri yunytju nyinanyi. Nyurrangarri watjalpayi yalatji, “Nganaṉatju yunytjurringanyi kutjupa tjuṯaku yungkunytjaku.” Yalatji kulira nganaṉatju yunytjurringanyi nyurrangarri yiniwayi mani tiṉa tjunkunytjaku Tjuutiyanya ngurrara tjuṯaku.
8Ngayulu wiya nyurrangarrinya watjaṉi palumpa tjanampa tjunkula kanyintjaku. Ngayulu nyurrangarrinya tjakultjunu Matjatuniyanya ngurrara tjuṯangku mani tiṉa tjunkula kanyiṉi. Tjingurunyurra yunytjurriku palula tjanala wirriḻi mani tiṉa kutjupa tjunkula kanyintjaku. Tjuutiyanya ngurrara tjuṯaku tjingurunyurra yunytjurringkula mani tiṉa tjanampa tjunkula kanyilku.
9Yiitju Kurayitjakunyurra ninti nyinanyi. Paluru mayutju tiṉa Katutjalawana nyinarra mantakutu ngalyankula waarrkana nguwanpa nyinangi, nganampa kuya waṉikitja. Yalatji paluru yaḻṯururringkula nganampa kuya waṉingu nganaṉa kana kutu nyinanytjaku. Nyurrangarri palunya nguwanpa yaḻṯururringkula mani tjunkula kanyintjaku, Tjuutiyanya ngurrara tjuṯaku, maralpa tjuṯaku.
10Yurrunpa nyurrangarri yunytjurringkula palumpa tjanampa mani aapa tjunkula kanyilpayi. Yiitjuku walytja kutjupa ngurrara tjuṯangku ngaṉṯi palumpa tjanampa tjunkupayi. Kuwarrinyurra ngayuku wangka kulintjaku.
11Ngayulu yunytjurringanyi nyurrangarri tjanampa piyuku mani tjunkula kanyintjaku, yurrunpa nyurrangarri mani palunya tjunkula kanyiṉutja tjungura, mani tiṉalpi ngarrinytjaku. Mani wiimatjarrangku mani wiima mukaṯingka tjunkunytjaku, mani tiṉatjarrangku mani tiṉa mukaṯingka tjunkunytjaku. Yalatjinyurra tjunkunytjala Katutjanya nyurrangarrimpa yunypa nyinaku. Yalatjinyurra mani tiṉa tjunkula kanyiṉingka nganaṉatjuṯarra yunypangku kulilku, “Yuwa, Kurinytjiyanya ngurrara tjuṯangku yurrunpa mani tjunkukitjangku watjara yiltalpiya tjunu.”
13Tjinguru tjaampalangku nyurrangarri yalatji kulilku, “Nganaṉa mani tiṉa tjanampa tjunkula wantirriyara tjinguru maralpa nguwanpa nyinaku, kanya Tjuutiyanya ngurrara tjuṯa mani tiṉatjarralpi nyinaku. Nganaṉa tjanampa wiya mani tiṉa tjunkunytjaku.” Nyurrangarri wiya yalatji kulintjaku, mani tiṉatjarranyurra kuwarri nyinanyi, kanya panyapa tjuṯa maralpa nyinanyi. Palya nyurrangarri tjanampa mani tiṉa tjunkula wantirriyantjaku. Ngula tjinguru nyurrangarri maralpa nguwanpa nyinanytjala paluru tjana Tjuutiyanya ngurrara tjuṯangku ngaparrtjingku nyurrangarrimpa tjunkula wantirriyalku.
15Katutjaku wangka irriṯi tjunutja yalatji ngarrinyi, “Irriṯi wati kutjupangku parrpaṯu mangarri tiṉa yurrara yintiṉu. Wati kutjupangku purinypangku mangarri wiima yurrara yintira tjunguṉu. Palulanguru paluru kutjarra nyinarra ngalkura paḻtjarringu.”
16Katutjalu Tayitutjanya nintiṉu, yaḻṯururringkula nyurrangarrinya yaṉṯayaṉṯantjaku. Paluru yalatji nyurrangarrinya yaṉṯayaṉṯalkitjangku kutu kulilpayi. Yalatji kulira nganaṉatju Katutjanya waḻkulpayi.
17Nganaṉatju Tayitutjanya tjapiṉu nyurrangarrilakutu yankula nyinanytjaku. Yalatji nganaṉatju tjapintjala paluru yuwa wangkangu. Nyurrangarrimpa yunytjurringkula paluru yalatji yuwa wangkangu.
18Tayitutjalawana nganaṉatju wati Yiitjuku walytja kutjupa wantirriyaṉi. Wati paluru tawunu tjuṯawana Yiitjuku wangka tjanala tjakultjurinkupayi. Paluru tjana wati palumpa yunyparringkupayi.
19Yiitjuku walytja tawunu kutjupa kutjupa ngurrara tjuṯangku wati panyapa ngurrtjaṉu nganaṉalawana tjungu yankunytjaku. Nganaṉa mani palunya Tjarutjalumalakutu katinytjala wati paluruṯarra tjungungku katiku. Tjuutiyanya ngurrara tjuṯangku mani palunya mantjira Katutjanya waḻkulku. Paluru tjana yalatji waḻkura kulilku, “Nganampa yunytjurringkula kutjupa ngurrara tjuṯangku mani ngaatjanya tjunkula ngalya wantirriyaṉu.”
20Mani tiṉa palunya purinypangku nganaṉa kanyira katikitjangkulatju kuliṉi, kutjupangkulanyatju yalatji watjaltjipingka, “Mani tjaampalanyurra tjinguru mulyaṯangku mantjiṉu.”
21Purinypangku kanyira katikitjangkulatju kuliṉi Katutjala kurungka, yaṉangu tjuṯangkuṯarraya nyakuyinkunytjala. Nyakuyinkulaya kulintjaku yalatji, “Puulalungarriya mani palunya tjukarurrungku kanyira katiyananyi, mulyaṯangku mantjintjawiyangku.”
22Nganampatju walytja wati kutjupa nyinanyi. Nganaṉatju Yiitjuku walytja wati palunyaṯarra Tayitutjalawana nyurrangarrilakutu wantirriyaṉi. Tjirripalaya tjungu yanku wati panyapa Yiitjuku walytja tjuṯangku ngurrtjaṉutja. Paluru tjana Yiitjuku tjukarurru nyinanyi. Nganampatju walytja wati paluru tjungungkulatju Katutjaku waarrka palyalpayi. Yaṉangu kutjupa tjuṯa paluru yaṉṯayaṉṯalpayi. Paluru yunytjurringanyi nyurrangarrilakutu yankula nyinanytjaku. Nyurrangarri Yiitjuku walytja palya nyinanytjala paluru kulira nyurrangarrimpa yunypa nyinanyi. Tayitutjanya Yiitjuku waarrkana palya nyinanyi. Ngali palumpa waarrka tjungungku palyarinkupayi.
24Tayitutjanyangarri nyurrangarrilakutu maa yankula tjarrpanytjala nyakula nyurrangarri yunyparringkula yaṉṯayaṉṯantjaku. Yalatji yunyparringkula Tayitutjanyangarrinyurra yaṉṯayaṉṯantjala, Yiitjuku walytja kutjupa ngurrara tjuṯangku kulira nyurrangarrimpa yunyparriku. Yalatji tjana kulilku, “Puulalungarri nganaṉanya tjukarurru tjakultjunu yalatji. Kurinytjiyanya ngurrara tjuṯa Yiitjuku tjukarurru nyinarra yaṉangu kutjupa tjuṯaku yunytju nyinanyi.”
