1Varavaragu e, Dirava ena harihari-bada, ekalesia oreadia Makedonia ai e harihari henidia, aia hadibalaimui.
2Ena be edia hisihisi na bada, to edia moale na bada herea; ena be edia ogoḡami na bada, to edia heduru na bada herea.
3Na gwauraia hedinaraimu, idia na edia goada heḡereḡerena e heni, ma edia goada e hereaia danu;
4bona e noimai lalo-dika, edia harihari ḡaudia baia abi, helaḡa taudia idurulaidia, eto.
5Dia ai emai helaro mo asie haheḡereḡerea. A, guna idia sibodia lalodia Lohiabada e henia, bona ai e henimai, Dirava ena ura heḡereḡerena.
6Una dainai Tito a noia, ina herahia ḡaukarana ia ese e matamaia, bena ia ese emui ai do baine haḡuḡurua ato.
7Benaini, ḡau iboudiai emui ai na babada: abidadama, bona hereva, bona lalo-parara, bona haheauka, bona iura-henimai; ina herahia karana danu emui ai baine bada.
8Asina haḡanimuimu; to idia haida edia haheauka amo umui emui uraheni na dibaiamu, ia na momokani eiava lasi.
9Badina be iseda Lohiabada Iesu Keriso ena harihari-bada vada dibamui: ia na taḡa tauna, to umui daimui ai ogoḡami tauna ai ela, ena ogoḡami amo umui baine hataḡamui totona.
10Egu lalo-hadai binai: ba karaia baine namo. Badina be laḡani muridai vada o haeroa bona o matamaia;
11bena harihari ba haḡuḡurua. Ihaerona ai o haraḡa heḡereḡerena, ihaḡuḡuruna ai danu ba haraḡa.
12Badina be tau ta lalona baine haraḡa, iabi-daena be enai e miamu ḡauna heḡereḡerena, dia e dabumu ḡauna heḡereḡerena.
13Lau asina tomamu haida ese laḡadia bae ani, a umui be ba hekwarahi mase.
14Lasi, iboumui ai ba heḡereḡere. Harihari umui na mai emui ḡau, a idia be e ogoḡamimu; taunabunai, ba kahadia. Kerukeru vanegai umui ba ogoḡami, bena idia ese bae kahamui; bena vada ba heḡereḡere.
15Buka ai e torea heḡereḡerena, eto, Mana momo e gogo tauna ana bahu se mia, A e gogo gadoi tauna ana be vada e davana.
16Dirava baita hanamoa badina be ia ese Tito lalona ai umui iura-henimui vada e havaraia;
17bena emai hahealo e abia dae, bona sibona ena ura dainai danu vada e vasi.
18Varavarada ta danu ia ida vada a siaia vasi; ia na mai harina namo, sivarai namo ihapiuna ai, ekalesia oreadia iboudiai lalodiai.
19Dia una mo, a ekalesia oreadia ese vada e abia hidi, ina herahia ḡaukarana iloalaina ai baine bamomai, Lohiabada iheatolaina bona ai lalomai ihaharagadia totona.
20Badina be emai gari tamona be tau ta ese baine habadelaimai, ina herahia badana a ḡaukaralaiamu dainai;
21bona emai ura tamona be baia ḡaukara maoromaoro, Dirava vairanai bona taunimanima vairadiai.
22Ma varavarada ta idia ida vada a siaia vasi; ena goada be nega momo vada a dibaia loulou, a harihari e goada hereamu, umui e abidadama henimuimu dainai.
23Haida ese Tito henanadaina bema henanadai, ia na lau bamogu, raruosi a ḡaukara heboumu umui daimui ai. Eiava hari varavarada henanadaidia bema henanadai, idia na ekalesia oreadia edia hesiai ilao-henina taudia, Keriso iheatolaina.
24Taunabunai, emui lalokau toana bona ai ese a heaḡilaimuimu badina ba hahedinarai, ekalesia oreadia vairadiai.
