2 Kings 10:1-21

¹Immoy medlip i ragag e pi’in owchen Ahab ni Pilung ni ur pired u lan fare binaw nu Samaria. Me yoloy Jehu bangi babyor nge yo’ornag yang nge pi’ yuyang nge yan ngak e pi tagagiyeg ko fare binaw, nge ngak e pi’in tayugang’, nge ngak e pi’in yad ma chathowliy e pi’in owchen Ahab. Regi babyor ney e be ga’ar riy:

²“Gimed e bmilfan ngomed e pi’in owchen fare pilung, ma bay u pa’med e pi chariot, os, talin e cham, nge pi binaw ni kani yororiy ni fan ko mael. Ere, yug nap’an nra taw e regi babyor ney ngomed,

³ma ngam mel’eged e cha’ nra bung ni nge pilung u fithik’ e pi’in owchen fare pilung, ngam pilung niged, mi gimed yororiy ko cham nra yib ngak.”

⁴Fapi tagagiyeg nu Samaria e rrusgad nib gel. Me lungurad, “Urgon ni ngad togopluwgad ngak Jehu, ni fa’anra de yag rok Joram ni Pilung fa Ahaziah ni Pilung?”

⁵Ere fare tolang ko salthaw nib milfan fare tafen e pilung ngak nge fa en nib ga’ nib milfan fare binaw ngak, nib mu’un fapi tolang u girdi’en fare binaw ngay nge fapi tachathowliy e pi’in owchen Ahab, e ra pi’ed e re thin ney ngak Jehu: “Gamad e pi tapigpig rom, ma kug fal’eged rogomad ni ngug rin’ed urngin e tin ga ra yog. Machane dab gu ted be’ nge mang pilung; mu rin’ e n’en ni ga be leamnag ni bfel’.”

⁶Miki yoloy Jehu bang e babyor nge yan ngorad: “Fa’anra gimed bay u ba’ rog ma kam fal’eged rogomed ni ngam rin’ed e tin ni gu ra yog ni ngam rin’ed, me ere mu feked lolugen e pi’in owchen Ahab ni Pilung i yib ngog nga Jezreel ko ngiyal’ney gabul.” Fa medlip i ragag i pi’in owchen Ahab ni Pilung e urmed u tan pa’ e pi tayugang’ nu Samaria, ni yad e ur chugliyedrad.

⁷Nap’an ni taw fare gi babyor rok Jehu ngorad, me thang e pi tayugang’ nu Samaria e fan rok fa medlip i ragag i pi owchen Ahab ni gubin, min tay lolgurad ngalan bogi dug, mar pi’ed nge yan ngak Jehu nga Jezreel.

⁸Ma nap’an nnog ngak Jehu ni kani fek i yib fapi llug ni lolugen e pi’in owchen Ahab, me yog ni ngan tay ni l’agruw ulung u langan e garog ko fare binaw min digey u rom nge yani kadbul u reb e rran.

⁹Me kadbul me yan ko fare garog me ga’ar ngak fapi girdi’ ni yad bay u rom, “I gag e cha’ ni gu makath nib togopluw ngak Joram ni Pilung mug thang e fan rok; gathi gimed e kireb romed e binem. Machane mini’ e ke thang e fan rok e picha’ney?

¹⁰Ren’ey e be micheg ni gubin ban’en nike yog SOMOL ni murung’agen e pi’in owchen Ahab e rra yib i m’ug nib riyul’. I SOMOL e ke rin’ e tin ni micheg u daken Elijah ni profet rok.”

¹¹Ma aram me thang Jehu e fan rok urngin e tin kabay i girdi’en Ahab ni yad be par u lan yu Jezreel, nge urngin e pi tolang ko salthaw rok, pi fager rok, nge pi prist rok; dariy bagyad npag nib fos.

¹²Me chuw Jehu u Jezreel ni nge yan nga Samaria. U kanawo’, nike taw nga bangi ban’en ni kanog “Gin ma par e pi’in ma gafaliy e saf riy”,

¹³me mada’eg boch i girdi’en Ahaziah ni immoy ni Pilung nu Judah me fithrad ni ga’ar, “Mini’ gimed?” Mar fulweged ni lungurad, “Gamad girdi’en Ahaziah. Gamad be yan i yan nga Jezreel ni nggu warod gu fingichiyed pifak Jezebel ni chitinngin e en pilung nge tin kabay u chon fare tabnaw rok e en pilung.”

¹⁴Me ga’ar Jehu ngak e pi salthaw rok, “Mu fekedrad ni ka yad bfos!” Mar koled fapi cha’, me thang e pogofan rorad u to’oben ba low u rom. Pi girdi’ nem e yad aningeg i ragag nge l’agruw u gubin, dariy bagyad nni pag nib fos.

¹⁵Miki yan Jehu bayay, ni kabay u kanawo’ me mada’eg Jonadab nib mo’on ni fak Rekab. Me nang Jehu salpen me ga’ar ngak, “Gur nge gag e ta’reb rogon ni gadow ma leam. Mog, ga ra pi’ e ayuw ngog?” Me fulweg Jonadab ni ga’ar, “Gu ra pi’.” Me ga’ar Jehu, “Ere mu pi’ paam ngog.” Mar kolew pa’ row, me ayuweg Jehu i Jonadab nge yib ngalang nga langgin e chariot rok,

¹⁶me ga’ar, “Mu’un ngog ngam guy nga owchem rogon feni gub yul’yul’ ngak SOMOL.” Mranow u ta’bang u lan fare chariot ngalan yu Samaria.

¹⁷Nap’an nra tawgow ngaram, me thang Jehu e fan rok urngin e pi’in girdi’en Ahab, nde pag bagyad. Irera’ e n’en nike yog SOMOL ngak Elijah nra buch.

¹⁸Me pining Jehu e girdi’ nu Samaria nga ta’bang me ga’ar ngorad, “I Ahab ni Pilung e i pigpig ngak fare got ni Baal ni buchuuw, machane gag e nggu pigpig ngak nib gel.

¹⁹Mu pininged nga ta’bang gubin e profet rok Baal, gubin e pi’in ma meybil ngak nge gubin e pi prist rok. Dariy be’ ni nge magey; nggu pi’ ba maligach nib ga’ ngak Baal, ma en ndabi un ngay e yira thang e pogofan rok.” (Biney e ba liyab ku Jehu ni nge thangmit gubin e pi’in ma meybil ku Baal.)

²⁰Me yog Jehu e n’en ni ngan rin’, “Mogned reb e rran ni ngan tayfan Baal!” Minog reb e rran,

²¹me pi’ Jehu e thin nge wear u daken fare nam nu Israel ni ga’ngin. Ma urngin e pi’in yad ma tayfan Baal marbad; dariy bagyad nde yib. Ma yigo’ ranod ngalan fare tempel rok Baal, mar suguyed u baley nge taw nga baley.