1Mʉsã Jesucristore ẽjõpeorãrẽ niyeru oꞌosere ojanemoweꞌe.
2Mʉsã oꞌosĩꞌrĩsere masĩtojaꞌa. Mʉsã tojo weesĩꞌrĩsere yʉꞌʉ eꞌcatise meꞌrã Macedoniacjãrãrẽ werewʉ. “Si cʉ̃ꞌma meꞌrã Corintocjãrã Acaya diꞌtapʉ nirã́ niyeru sẽrĩneonʉꞌcãsĩꞌrĩwã”, niwʉ̃ narẽ. Tere tʉꞌorã, pãjãrã Macedoniacjãrã quẽꞌrã eꞌcatise meꞌrã niyeru neonʉꞌcãwã.
3Mʉsãrẽ “Niyeru oꞌorãsama” nimigʉ̃, Titore cʉ̃ meꞌrãcjãrã meꞌrã mʉsã tiropʉ oꞌógʉti. Yʉꞌʉ Macedoniacjãrãrẽ níꞌque queoro waꞌacã ʉaꞌa. Yʉꞌʉ “Corintocjãrã niyeru neonʉꞌcãtojawã” níꞌcaronojõta mʉsã oꞌoatjere cʉoyutojaya.
4Apetero yʉꞌʉ mʉsã tiropʉ waꞌacã, Macedoniacjãrã yʉꞌʉ meꞌrã waꞌabosama. Ʉ̃sã topʉ etacã, mʉsã neoyuticã, yʉꞌʉ ʉpʉtʉ bopoyasãbosaꞌa. Yʉꞌʉ “Na neonʉꞌcãtojawã” níꞌque ye buꞌiri tojo weebosaꞌa. Mʉsã quẽꞌrã mejãrõta bopoyabosaꞌa.
5Tojo weegʉ yʉꞌʉ aꞌtiro wãcũꞌu. Yʉꞌʉ mʉsã tiropʉ waꞌase dʉporo Tito quẽꞌrãrẽ waꞌadutiꞌi. Na mʉsã “Oꞌorãti” ni sẽrĩneoꞌquere apoyurãsama. Na tojo weecã, ʉ̃sã ejase dʉporo cʉoyutojarãsaꞌa. Tojo weerã mʉsã wãcũrõ oꞌorãsaꞌa. Tojo weetirã, ʉ̃sã ejarãpʉ “Oꞌoroʉaꞌa” nicãma, mʉsã ãpẽrã dutiro weerã weebosaꞌa.
6Mʉsã aꞌtere wãcũña. Marĩ cãꞌrõacã otecã, marĩ oteꞌque cãꞌrõacã pĩꞌrĩ dʉcatiꞌi. Peje otegʉnojõ peje pĩꞌrĩ dʉcatinoꞌsami. Te weronojõ marĩ pajasecʉorãrẽ pajiro oꞌocã, Õꞌacʉ̃ quẽꞌrã marĩrẽ oꞌoꞌcaro ejatuaro oꞌosami.
7Marĩnʉcʉ̃ tocãꞌrõ oꞌogʉti ni tʉꞌoñaꞌrõ oꞌoroʉaꞌa. Marĩ oꞌosĩꞌrĩtirã, o ãpẽrã dutiro weronojõ tʉꞌoñaꞌrã, oꞌoticãꞌrõʉaꞌa. Marĩ eꞌcatise meꞌrã oꞌocã, Õꞌacʉ̃ marĩrẽ maꞌisami.
8Õꞌacʉ̃ nipeꞌtise añuse mʉsãrẽ oꞌoyʉꞌrʉo oꞌomasĩmi. Cʉ̃ tojo weecã, mʉsãrẽ dʉꞌsasenojõrẽ cʉopeꞌorãsaꞌa. Tojo nicã noꞌo nisere ãpẽrãrẽ weetamunuꞌcũrãsaꞌa.
9Õꞌacʉ̃ ye queti ojáca pũrĩpʉ ojaꞌcaronojõta niꞌi. Aꞌtiro ojanoꞌcaro niwʉ̃: Añugʉ̃ pajasecʉorãrẽ añurõ oꞌomuꞌsĩ oꞌosami. Tojo weero cʉ̃ añurõ weese ninuꞌcũcãꞌrõsaꞌa.
10Õꞌacʉ̃ otese capere oꞌomi. Tojo nicã baꞌase quẽꞌrãrẽ oꞌomi. Cʉ̃́ta nipeꞌtise mʉsã cʉoatjere oꞌogʉsami. Nipeꞌtisere nemorõ cʉocã weegʉsami. Tojo weerã mʉsã ãpẽrãrẽ nemorõ oꞌomasĩrãsaꞌa.
11Tojo weerã peje cʉorã, ãpẽrãrẽ oꞌomuꞌsĩ oꞌorãsaꞌa. Ʉ̃sã quẽꞌrã mʉsã oꞌosere pajasecʉorãrẽ oꞌorãti. Mʉsã tojo oꞌocã ĩꞌarã, marĩ acawererã Õꞌacʉ̃rẽ eꞌcatise oꞌorãsama.
12Mʉsã Õꞌacʉ̃ yarã pajasecʉorãrẽ oꞌorã, narẽ weetamurã weeꞌe. Õꞌacʉ̃ quẽꞌrãrẽ eꞌcatise oꞌocã weeꞌe.
13Mʉsã sẽrĩneosere oꞌorã, Cristore queoro ẽjõpeosere narẽ ĩꞌoꞌo. Mʉsã cʉ̃ dutisere yʉꞌticã ĩꞌarã, Õꞌacʉ̃rẽ eꞌcatipeorãsama. Mʉsã pajiro oꞌosere ĩꞌarã, Õꞌacʉ̃rẽ añurõ wãcũrãsama. Tojo nicã nipeꞌtirãrẽ oꞌosere ĩꞌarã, tojo weerãsama.
14Na peꞌe quẽꞌrã mʉsãrẽ maꞌírã, Õꞌacʉ̃rẽ sẽrĩbosarãsama. Õꞌacʉ̃ mʉsãrẽ añurõ weecã ĩꞌarã, tojo weerãsama.
15Õꞌacʉ̃ marĩrẽ Jesucristore oꞌogʉ, añubutiaro weegʉ weecʉ niwĩ. Tojo weerã cʉ̃rẽ eꞌcatise oꞌorã.
